İnternetə qoşulma üçün bir neçə fərqli texnologiya mövcuddur. Buna görə də provayder seçərkən onların hansı texnologiyadan istifadə etdiklərini və bu texnologiyanın üstünlüklərini, məhdudiyyətlərini yaxşı başa düşmək vacibdir.
ADSL (Asymmetric Digital Subscriber Line)
Ən geniş yayılmış internet bağlantı texnologiyalarından biri ADSL-dir. Bu texnologiya mövcud telefon xətləri üzərindən internet bağlantısı qurmağa imkan verir. Əgər mənzilinizdə telefon xətti yoxdursa, provayder sizin üçün avtomat telefon stansiyasına (ATS) qoşulmadan ayrıca xətt çəkə bilər. ADSL texnologiyasının geniş yayılmasının əsas səbəbi onun digər texnologiyalara nisbətən daha ucuz başa gəlməsidir. Adətən, ADSL bağlantısı ilə istifadəçilərə 24 Mbit/s-ə qədər yükləmə (download) və 1 Mbit/s-ə qədər ötürmə (upload) sürəti təklif olunur.
Kabel internet
Bu texnologiya əsasən Kabel TV xidməti göstərən provayderlər tərəfindən təqdim edilir. Kabel internet istifadəçilərə 3 Mbit/s-dən 100 Mbit/s-ə qədər sürət təklif edə bilir. Lakin bu texnologiyanın çatışmazlıqlarından biri odur ki, istifadəçi sayı artdıqca internet sürətində azalma müşahidə oluna bilər. Sürət həm də provayderin infrastrukturunun istifadəçiyə olan məsafəsindən asılıdır.
Peyk interneti
Peyk interneti peyk antenaları vasitəsilə təmin edilir və istifadəçini coğrafi məkanından asılı olmayaraq internetlə təmin etməyə imkan verir. Bu texnologiya 3-15 Mbit/s sürət vəd edir. Ən böyük üstünlüyü geniş əhatə dairəsinə malik olmasıdır. Lakin bu texnologiyanın mənfi cəhətləri var: sürət nisbətən aşağıdır və xidmətin dəyəri yüksək ola bilər.
Wi-Fi
Wi-Fi texnologiyası naqilsiz internet bağlantısını təmin edir. Bu texnologiya nəzəri olaraq 108 Mbit/s sürət təklif etsə də, real istifadədə bu göstərici adətən 4-6 Mbit/s civarında olur. Eyni zamanda, istifadəçi sayı artdıqca şəbəkə yüklənir və sürət azalır.
Digər texnologiyalar
Bundan əlavə, FTTH (Fiber To The Home – liftdən birbaşa evə), ETTH (Ethernet To The Home), Wi-Max və LTE kimi müasir və daha yüksək keyfiyyətli qoşulma texnologiyaları da mövcuddur. Bu texnologiyalar adətən daha yüksək sürət və daha sabit bağlantı təmin edir.
Provayder seçərkən nələrə diqqət etməli?
İnternet provayderi seçərkən yalnız sürətə və texnologiyaya deyil, həm də qiymət və xidmətin keyfiyyətinə diqqət yetirmək vacibdir. Müxtəlif provayderlər rəqabət səbəbilə eyni xidmət üçün fərqli qiymətlər təklif edə bilərlər. Çox zaman istifadəçilər daha ucuz təkliflərə üstünlük verirlər, lakin nəzərə almaq lazımdır ki, ucuz xidmət həmişə keyfiyyətli olmaya bilər.
Ən optimal seçim odur ki, siz internetdən istifadənizi düzgün qiymətləndirəsiniz, tələblərinizə uyğun sürət və bağlantı növünü seçəsiniz və müvafiq olaraq etibarlı provayderlə müqavilə bağlayasınız.
Hazırladı: UĞUR
