Müasir dövrdə sağlam həyat tərzi yaratmaq üçün fiziki fəaliyyətin əhəmiyyəti artmışdır. MayoMed Medikal Fizioterapiya və Reabilitasiya Mərkəzinin təsisçisi və baş həkimi, terapevt, ailə həkimi Nərminə Abbasova bu mövzu ətrafında “Gencaile.az” saytına açıqlamasında fiziki aktivliyin orqanizm üzərindəki faydalarına dair bir sıra əhəmiyyətli məlumatlar təqdim etdi.
Nərminə Abbasova bildirir ki, müntəzəm fiziki fəaliyyət, ürək-damar sisteminin sağlamlığını qorumaqla yanaşı, bədənin ümumi funksiyalarını da yaxşılaşdırır: “Fiziki fəaliyyət qan dövranını yaxşılaşdırır, ürək və damarların sağlamlığını dəstəkləyir. Eyni zamanda, yüksək qan təzyiqinin və xolesterinin səviyyələrini normallaşdırır.”
Həkim, fiziki fəaliyyətin həmçinin əzələlər və oynaqlar üzərindəki faydalarını da vurğuladı: “İdman əzələləri möhkəmləndirir və oynaqların hərəkət qabiliyyətini artırır. Müntəzəm məşqlər oynaqlarda ağrıları azaldır və artrit kimi xəstəliklərin qarşısını alır.”
Nərminə Abbasova, fiziki fəaliyyətin stressin azaldılmasına da müsbət təsir etdiyini qeyd edib: “İdman zamanı bədən endorfin adlanan xoşbəxtlik hormonları ifraz edir, bu da ruh halını yaxşılaşdırır və stressi azaldır. Stressin uzun müddət bədəndə qalması, bir çox xəstəliklərə səbəb ola bilər, amma fiziki fəaliyyət bu təsirləri minimuma endirir.”
Həkimin sözlərinə görə, fiziki aktivlik həmçinin beyin funksiyalarını yaxşılaşdırır və zehni sağlamlığı dəstəkləyir: “Aktiv həyat tərzi insanın fokuslanma qabiliyyətini artırır, yaddaşı yaxşılaşdırır və ümumi zehni sağlamlığı gücləndirir. Həmçinin, müntəzəm idman depressiya və anksiyete kimi psixoloji narahatlıqların qarşısını alır.”
Nərminə Abbasova, fiziki fəaliyyətin əhəmiyyətinə dair ən vacib məqamları vurğulayaraq, aktiv həyat tərzinin uzun ömürlü və sağlam bir həyatın əsasını qoyduğunu bildirir: “İdman yalnız bədənimizi deyil, həm də ruhumuzu gücləndirir. Bu, sadəcə estetik məqsədlər üçün deyil, sağlamlıq üçün vacibdir. Hər kəs öz sağlamlığını qorumaq üçün gündəlik fəaliyyətə vaxt ayırmalıdır.”
Sonda, həkim, fiziki aktivliyin yalnız bədənin sağlamlığı üçün deyil, həm də ümumi həyat keyfiyyətinin artması üçün də vacib olduğunu qeyd edir: “Həyat tərzi ilə bağlı atacağımız kiçik addımlar belə uzun müddətli sağlamlığa böyük təsir göstərir.”
