Pandemiya ilə bağlı pozitiv xəbərlər gəlməyə başlayır. Deyəsən, bütün dünyanı qorxuya salan virusu yola salmaq üzrəyik. Artıq bəzi ölkələr karantin qaydalarını ləğv edir, hətta COVID xəstələri üçün özünütəcrid tələbi aradan qaldırılır. Bəs Azərbaycan virusla nə vaxt vidalaşacaq? Ümumiyyətlə, yaxın gələcəkdə COVID tarixə qovuşacaqmı?
Məlumdur ki, ötən aydan etibarən ölkəmizdə COVID-ə yoluxanların karantin müddəti 14 gündən 7 günə endirilib. Buna səbəb xəstəliyin həm inkubasiya dövrü, həm də yoluxdurma müddətinin 6-7 gün çəkməsidir. Bəs o 7 gündən nə vaxt imtina edəcəyik?
“Pandemiya artıq eniş mərhələsindədir”
Milli Məclisin Səhiyyə komitəsinin üzvü Müşfiq Məmmədli bildirdi ki, pandemiya artıq eniş mərhələsindədir: “Omikron” ştammı ilə yoluxmaların analizini, xəstəliyin klinikasını müşahidə etdikdə, görürük ki, virus daha çox yuxarı tənəffüs yollarındadır və simptomsuz keçən formalar çoxdur. Proseslərin analizi onu göstərir ki, bir neçə mutasiyalar keçirmiş virus öz gücünü itirir və xəstəlik yüngülləşir. 2 illik mübarizədən sonra virus cəmiyyətdə müəyyən adaptasiya prosesi keçib və pandemiya artıq eniş mərhələsindədir”.
“Pandemiya kabusu”ndan qurtulacağıq”
Həmsöhbətimiz vurğulayır ki, yay aylarında biz də virusla vidalaşacağıq: “Pandemiyanın sonunu gətirən ən mühüm faktor vaksinasiyadır. Vaksinasiyanın dünya ölkələrində, xüsusən də, Azərbaycanda kifayət qədər yüksək templə həyata keçirilməsi və insan sağlamlığına dəyər verən dövlətlərin bu prosesə ciddi yanaşması, bizi qalibiyyətə aparır. İmmuniteti olan insanların həm yoluxmalar, həm də vaksinasiya hesabına artmasını müşahidə edirik. Virusun mutasiyasının da prosesin nisbətən yüngül formada keçən ştammlara istiqamətlənməsi onu deməyə əsas verir ki, artıq isti aylara doğru “pandemiya kabusu”ndan qurtulacağıq. Ölkəmizdə vaksinasiyanın ikinci dozasının 70-80 faizlik rəqəmə yaxınlaşması, buster dozada 30-40 faizlik nəticənin əldə olunması onu göstərir ki, Azərbaycanda formalaşmış immuniteti olan insanların sayı kifayət qədərdir. Bu, optimist proqnozlar verməyimiz üçün əsasdır. Yay aylarında virussuz, daha gözəl mühitdə yaşayacağıq”.
“Mövsümi xəstəlik halına keçəcək”
Həkim Elvin Hüseynov deyir ki, artıq virus həkimlər tərəfindən tanınır və müalicəsi də mövcuddur. Virusun sonu nə vaxtsa gələcəkdi. O gün, artıq uzaqda deyil: “Pandemiya, görülən tədbirlər ömür boyu davam edə bilməz. Nə vaxtsa sonu olmalıdır. Sadəcə olaraq, virus yeni olduğu üçün bu addımları ilkin fazalarda atmaq mümkün deyildi. Amma indi nəzərə almaq lazımdır ki, istər “delta”, istərsə də “omikron” variantında təsirli dərmanlar mövcuddur. İnkişaf etmiş ölkələrdə risk qrupuna aid olan insanların xəstəliyi yüngül keçirməsi üçün antiviral, yoluxmuş və ağır keçirmiş xəstələr üçün isə anticisim kokteylindən istifadə edilir. Düşünürəm ki, peyvəndləmə prosesində öndə olan ölkələr bu addımları daha tez atacaqlar və pandemiyaya “yox” deyəcəklər. Koronovirus da ancaq endemik şəkildə mövcud olacaq. Qrip infeksiyası kimi mövsümi xəstəlik halına keçəcək”.
“Məhdudiyyətlər aradan qaldırıla bilər”
İnfeksionist Mərdan Əliyev də yay aylarında pandemiyanın fəsli infeksiyaya keçəcəyini düşünür: “Omikron” variantında yoluxma sayı pik həddə çatsa da, səhiyyə sistemimiz yüklənmədi. Xəstələrin əksəriyyəti ev şəraitində rahat müalicə olunurlar. Ağırlaşma olmadığı üçün də yoluxma sayı və aktiv xəstə sayı çox olsa da, müəyyən qapanmalara gedilmədi, hətta bəzi məhdudiyyətlər yumşaldıldı. Pandemiyanın ləğv olunması ölkəmizdə yaxın vaxtlarda gözlənilir. Artıq yoluxma sayının pik həddindən sonra enməsi mərhələsindəyik. Vəziyyət belə davam edərsə, aktiv xəstə və yoluxma sayına baxılacaq, digər ölkələrdə olduğu kimi bizdə də məhdudiyyətlər aradan qaldırılacaq”.
Pandemiyanın əleyhinə, bizim xeyrimizə…
Həkim vurğuladı ki, isti günlərin gəlməsi pandemiyanın əleyhinə, bizim xeyrimizədir: “Artıq yaz fəsli gəlir. Bu da virusa qarşıdır və yoluxma sayını azaldacaq. Buna görə də yaxın müddətdə pandemiyanın bitəcəyini gözləyirik. COVID artıq fəsli infeksiyaya çevriləcək. Yəni qrip kimi kəskin respirator virus infeksiyalarından biri olacaq. Artıq payız, qış aylarında xəstəlik epidemiya həddində olmayacaq”.
Aygün ƏZİZ
