Bu il keçirilən qəbul imtahanlarında Zərdab rayonunun Şirvani adına İsaqbağı kənd tam orta məktəbinin bütün məzunları tələbə adını qazanıblar. Yüksək nəticəsi ilə fərqlənən məktəbin direktoru Dayangül Vəliyeva ilə söhbətləşdik.
Dayangül müəllim bildirdi ki, hər bir şagirdi ilə qürur duyur: “11 ildir ki, bu məktəbdə direktor vəzifəsində çalışıram. Bundan əvvəl məktəbdə heç vaxt 600 bal toplayan şagird olmamışdı. Amma son illərdə hətta elə olub ki, bütün rayon üzrə yalnız bir nəfər bu nəticəni göstərib və o da bizim məktəbin məzunu olub. Bu, mənim üçün böyük qürurdur”.

“Şagirdlərimi balamdan ayırmamışam”

Direktor bildirir ki, bu nəticələrin arxasında yalnız təhsil yox, həm də şagirdlərlə qurulan dostluq və güvənə əsaslanan münasibət dayanır: “Şagirdlərimi müəllim olduğum dövrdə də heç vaxt qorxu ilə idarə etməyə çalışmamışam. Mənim üçün vacib olan onların mənə qorxaraq deyil, sevgi ilə yaxınlaşmağı olub. Ərköyünlə ərköyün, ağıllı ilə ağıllı, dəlisov ilə dəlisov olmuşam. Hətta olub ki, şagirdlər bir yerdə hazırlıqları ilə bağlı müzakirələr aparmaq üçün otaq istəyiblər, öz otağımı onlara vermişəm. Deyirdim ki, probleminiz olarsa, mənimlə bölüşün, həll edək. Məktəb daxilində, sakitcə həll etdiyimiz məsələlər də olub. Heç bir şagirdimi balamdan ayırmamışam. Ona görə də bu gün balalarımın uğuruna sevinirəm”.

“Kənddə qızların təhsilə marağı yüksəkdir”

Bəzi bölgələrdə, xüsusilə də, ucqar kəndlərdə qızların təhsildən yayınması ilə bağlı hallar müşahidə olunur. İsaqbağı kəndində ali məktəbə qəbul olan on şagirdin altısının qız olması direktoru xüsusilə sevindirir. Deyir ki, bu kənddə qızların təhsilə marağı yüksəkdir: “Bizim kənddə qızların təhsildən yayınması halları demək olar ki, yoxdur. Bu, məktəb kollektivinin və valideynlərin birgə əməyi nəticəsində mümkün olur. Valideynlər şagirdlərin, xüsusilə də qızların təhsilinə böyük önəm verirlər. Məsələn, sonuncu dəfə 11-ci sinif şagirdinin nişanlanmaq niyyəti barədə məlumat aldıq. Valideynlərini məktəbə dəvət etdik, vəziyyəti ətraflı müzakirə etdik. Qeyd etdik ki, qız uşaqları üçün təhsil mütləqdir və onların gələcəyi üçün bu, ən vacib amillərdən biridir. Ailə ilə aparılan maarifləndirici söhbətlər nəticə verdi və valideynlər qərarlarını dəyişdilər. Yəni bu sahədə əldə olunan nəticələr təkcə məktəb rəhbərliyinin deyil, eyni zamanda valideynlərin də anlayışlı və məsuliyyətli yanaşmasının göstəricisidir. Qız valideynləri övladlarının təhsilli olması üçün əllərindən gələni edirlər”.

Uşağın həyatında müəllimin rolu böyükdür

Direktor deyir ki, uşağın həyatında müəllimin rolu böyükdür. O da şagirdlərinin həyatında sehrli toxunuşlar edib: “İllər əvvəl bir şagirdimiz var idi. Nadinc, islaholunmaz deyirdilər. Anası rəhmətə getmişdi, ailə şəraiti də çətin idi. Müəllimlər ondan şikayət edirdilər, dərslərə mane olurdu, qaydalara əməl etmirdi. Atası da artıq ümidsiz vəziyyətdə məktəbə gəlib dedi ki, bu uşağı məktəbdən çıxarın, nə müəllimlərin, nə də qonşuların üzünə baxa bilirəm. Amma mən razılaşmadım. Dedim ki, uşağın dəstəyi ehtiyacı var. O şagirdi məktəbdən çıxmağa qoymadım, əksinə, onunla dost oldum, vaxt ayırdım, dəyər verdim. Onun özünəinamını artırmaq üçün bilik yarışı təşkil etdik, sualları özü tərtib etdi. Yarış zamanı otağı tərk edirdim, ona deyirdim ki, sən buradasansa, mənim gözüm arxada qalmayacaq. Beləcə ona məsuliyyət hissi aşıladım. Nəticədə həmin uşaq Fövqəladə Hallar Nazirliyinin Akademiyasına daxil oldu və bu gün mötəbər bir vəzifə sahibidir”.

Sinifdə yaradılan sağlam atmosfer 

Direktor bildirir ki, bu, həmin sinfin ilk uğuru deyil: “Builki məzunlarımızdan olan Qismət o sinifdə zəif oxuyan şagirdlərdən biri idi. Amma sinifdəki digər doqquz şagird onu heç vaxt kənarda qoymadı. Tənəffüsdə belə tək buraxmırdılar. Biri onu aparıb testlərlə məşğul olurdu, digəri tapşırıqlara kömək edirdi. Elə bir mühit yaratmışdılar ki, Qismət də təhsilə daha ciddi yanaşmağa başladı. Doqquzuncu sinif də daxil olmaqla, əvvəlki illərdə demək olar ki, nəticəsi zəif idi. Amma 10-11-ci sinifdə sinif yoldaşlarının dəstəyi ilə dəyişdi, əzmlə çalışdı və nəticədə ali məktəbə qəbul olmağı bacardı. Bu hadisə mənim üçün çox dəyərlidir, çünki burada kollektivin gücü, sinifdə yaradılan sağlam atmosferin necə möcüzələr yarada biləcəyi açıq şəkildə görünür”.

Direktor vurğulayır ki, nəticələr açıqlananda gec saatlara qədər valideynlərlə, şagirdlərlə danışıb, onların sevinclərinə şərik olub: “Nəticələr açıqlanan kimi gecə saatlarında hər biri ilə tək-tək əlaqə saxladım. Kimisi ilə zənglə, kimisi ilə “WhatsApp” üzərindən danışdıq. Hamısını ürəkdən təbrik etdim”.

Valideyn, məktəb, müəllim üçbucağı…

“İsaqbağı kənd məktəbinin uğurunun kökündə nə dayanır” sualına gəldikdə isə, müsahibimiz bildirir ki, valideyn, məktəb, müəllim üçbucağı düzgün qurulub: “Əgər bu üç tərəf arasında sağlam əlaqə və qarşılıqlı anlaşma varsa, nəticə mütləq olacaq. Təəssüf ki, bəzən valideynlər məktəblə əlaqə saxlamaq istəmir, məsuliyyətdən yayınırlar. Mən bir müəllim, direktor kimi əlimdən gələn hər şeyi edə bilərəm. Amma əgər valideyn bu prosesdə mənə dəstək olmursa, bu zaman uğurlu nəticə əldə etmək çətinləşir. İkinci növbədə sevgi və hörmətdir. Şagirdlər arasında elələri var ki, müəyyən mövzularda valideynləri ilə paylaşmadıqlarını bizimlə bölüşürlər. Bu isə o deməkdir ki, məktəbdə onlara etibar edə biləcəkləri mühit formalaşıb”.

“Pis şağird yoxdur”

Məktəb direktoru vurğulayır ki, məqsədləri təkcə yüksək bal deyil, həm də sağlam düşüncəli və cəmiyyətə faydalı gənclər yetişdirməkdir: “Bizim təcrübəmiz göstərir ki, əslində pis və ya yola gəlməyən şagird yoxdur. Sadəcə, hər bir şagirdin fərdi yanaşmaya ehtiyacı var. Əgər müəllim əsl pedaqoqdursa, hər bir şagirdin xarakterini, davranış modelini və qavrama səviyyəsini tanımalı, ona uyğun yanaşma nümayiş etdirməlidir”.

Dayangül müəllim onları universitet həyatında da dəstəkləyir. Deyir ki, işləri onların məzun olması ilə bitmir: “Kənd məktəbində hamı bir-birini tanıyır, kömək etməyə çalışır. Uşaqlar da bir-birilərinə dəstək olurlar. Hamımız əlbir olub onları tələbəlik həyatında da məktəb heyəti olaraq dəstəkləyirik”.

Aygün Əziz