Pandemiya uzun müddətdir ki, bir çox sahələrdə durğunluq yaratsa da, öncəki aylarla müqayisədə hazırda daşınmaz əmlak bazarında – alqı-satqıda canlanma müşahidə olunur.

Daşınmaz əmlak mütəxəssisi Elnur Azadov mövcud durumu aşağıdakı kimi qiymətləndirdi: “Son bir ildir ki, daşınmaz əmlak ehtiyaclarını həyata keçirə bilməyən müştərilərin bir qismi bu gün bazarda aktivlik nümayiş etdirir. Son bir ildə adətən sərt karantin rejimi aradan qaldırıldıqda daşınmaz əmlak sektorunda bir canlanma yaranırdı. Hazırda da belədir. Bir tərəfdən vaksinasiya, digər tərəfdən iqtisadi proseslərin bərpa olunması fonunda daşınmaz əmlak bazarında da canlanmanın olması gözlənilən idi”.

Qiymət artımından danışan ekspert deyir ki, 2020-ci ildə tikinti şirkətləri üçün tətbiq edilən yeni vergi qaydaları da maya dəyərinə təsir etdi. İnşaat şirkətləri öncəki həcmdə inşaat işi apara bilmədi. İnşaatın həcminin azalması amili isə maya dəyərinə təsirsiz ötüşmədi. Beləcə, tikinti şirkətləri qiymətləri 12-17 faiz qaldırdı. Qiymətlərin qalxması həm birinci, həm də ikinci əl bazarına təsir etdi”.

“Vergilərlə bağlı yeni qaydalara müvafiq olaraq tikinti şirkətləri yeni layihələri də yeni qiymətlərlə bazara çıxarıblar. Artıq bazarda tələbatın artması ilə əlaqədar olaraq müxtəlif təkliflər, kampaniyalar var. May ayından bir qədər qiymətlərdə artım gözlənilir, lakin faktiki olaraq bu, bazarda ciddi olaraq əksini tapmayacaq”, – deyə o əlavə edir.

Ekspert regionlardakı vəziyyət və kirayə mənzil bazarından da söz açıb: “Yanvarda tədrisin bərpası ilə bağlı məlumat verildi və bundan sonra qısamüddətli tələbə axını müşahidə olundu ki, bu da kirayə mənzil bazarında da özünü göstərdi. Kirayə mənzillərin qiyməti qalxdı, bazarda müştərilər artdı, təkliflər azaldı. Regionlarda isə vəziyyət stabil olaraq qalır. Hər il bölgələrdə torpaq qiymətlərində artım olsa da, bu il o da gözə çarpmadı. Regionlarda alıcılıq qabiliyyəti zəifləyib”.

“İldən-ilə tikinti şirkətlərinin sayı artır. 2005-2008-ci illərdə tikinti layihələrinin ən çox olduğu il kimi yadda qalıb. İl ərzində təxminən 100-dək yeni layihəyə start verilirdi. 2017-2019-cu illərdə də təxminən bu qədər layihə icra olunmağa başladı. Lakin bu il o qədər də artım olmayıb. İl ərzində 30-40 yeni layihəyə start verildi”, – deyə o əlavə edib.

Qeyd edək ki, yerindən asılı olaraq Bakıda köhnə tikilidə olan 1 otaqlı evlərin qiyməti 35-165 min arasında dəyişilir. Yeni tikililərdə isə bu qiymət 225 min manatadək təşkil edir.

Sumqayıtda isə yeni tikililərdə birotaqlı mənzillərin qiyməti 34-65 min manat, köhnə tikililərdə isə 19-41 min manat arasında dəyişilir.