Fransanın TF1 telekanalında yayımlanan “The Voice” (“O səs”) şousundakı çıxışı ilə məşhur olan azərbaycanlı musiqiçi Araz Hümbətli Tuluzada yerli polis tərəfindən saxlanılıb.
Araz Hümbətli küçədə mahnı oxuduğu üçün tutulub. O, polis tərəfindən dindirildikdən sonra sərbəxt buraxılıb.
“Tuluza küçələrində tez-tez musiqilər ifa edirəm. Buna görə polis məni bir neçə dəfə saxlayaraq bölməyə aparıb. Xoşbəxtlikdən Tuluzanın polisləri mənə hörmət edib, azadlığa buraxdılar. Onlar gözəl mahnı ifa etdiyimi, lakin küçədə oxumağın qadağan olduğunu dedilər”.
A.Hümbətli Fransaya köçməsi ilə bağlı çoxsaylı suallara da cavab verib: “Mən Azərbaycandan Fransaya sevgimə görə gəlmişəm. Üç il əvvəl Bakıda işləyən fransız xanım Pieraya aşiq oldum. Biz ailə həyatı qurduq və Parisə köçdük. Lakin ora olduqca soyuq idi. Mən təsadüfən “Google Maps”də Fransanın cənubunda yerləşən şəhərlərə baxdım. Tuluza küçələrini, kərpicdən olan binaları görəndə burada yaşamaq qərarına gəldim. Biz 20 ay əvvəl bu şəhərə köçmüşük və Krua-de Pyer rayonunda yaşayırıq. Tuluza mənim üçün sevgi şəhəridir”. (azvision.az)
