14 may tarixində Bakı Biznes Universitetində REHA Təlim-Təhsil Mərkəzi və Bakı Biznes Universitetinin təşkilatçılığı ilə keçirilən “Gələcək Gənclərlə Gələcək – 2” forumunda spiker kimi çıxış edən gənclərin maraqlı və kreativ təqdimatları bir daha sübut etdi ki, Azərbaycanın gəncləri yalnız gələcəyin daşıyıcıları deyil, həm də bu günün düşüncə liderləridir. Forumda iştirak edən gənclərin təqdimatları həm məzmun baxımından zəngin, həm də təqdimat üslubu baxımından son dərəcə orijinal idi.
Gənclərin toxunduğu mövzular – texnologiyadan təhsilə, sosial innovasiyalardan gələcəyin peşə bacarıqlarına qədər geniş bir spektri əhatə edirdi. Hər bir çıxışçı özünəməxsus yanaşması və fərdi baxış bucağı ilə seçildi. Bu təqdimatlar yalnız bilik paylaşımı ilə kifayətlənməyib, dinləyicilərə düşünmək, ilham almaq və fəaliyyətə keçmək motivasiyası verdi.
Xüsusilə, vizual materiallardan yaradıcı şəkildə istifadə, hekayə anlatma texnikalarının tətbiqi və interaktiv ünsiyyət vasitələri təqdimatları daha da maraqlı və yaddaqalan etdi. Bu cür təqdimatlar, auditoriya ilə sağlam körpü quraraq, gənclərin nə qədər hazırlıqlı, məqsədyönlü və təşəbbüskar olduğunu bir daha nümayiş etdirdi. Belə forumlar, gənclərin səslərinin eşidildiyi və onların ideyalarının dəyər qazandığı platformalar kimi əhəmiyyətli rol oynayır.
Forumun ilk Spikeri: Asim Novruzov
Forumun ilk çıxışçısı Bakı Biznes Universitetinin İqtisadiyyat və İdarəetmə fakültəsinin 1-ci kurs tələbəsi Asim Novruzov oldu. “2030-a Hazırlıq” mövzusu ilə təqdimat edən Asim, hər kəsin diqqətini çəkdi. Danışmağa başladığında, sanki qarşımızda bir təqdimatçı yox, həyatın içindən çıxıb gəlmiş bir insan var idi. Hekayəsini danışdı, qorxularını, səhvlərini, cəhdlərini bizimlə bölüşdü və biz anladıq ki, bu təqdimat yalnız bacarıqlardan yox, özünü yenidən yaratmaqdan bəhs edir.
Asim Novruzov bizə göstərdi ki, dəyişmək üçün fövqəladə şəraitə ehtiyac yoxdur; bəzən bir qərar, bir addım kifayətdir. O deyəndə ki, “İşdən atıldı, amma sonra öyrənməyə başlayıb şirkətin online satışlarını idarə etdi”, mən də düşündüm: “Əgər o bacarıbsa, mən niyə bacarmayım?”
Mənə ən çox təsir edən cümləsi isə belə oldu: “Niyə sən olmayasan?” Bu, mənim üçün sadəcə motivasiya yox, çağırış idi. Çünki mən də çox şey istəmişəm, amma öyrənməyə başlamağa cəsarət etməmişəm. Asim Novruzovun çıxışında başa düşdüm ki, uğur yalnız istəkdən yox, hərəkətdən doğur.
Asim, gələcəyin bacarıqlarını da sadaladı: süni intellekt, data analitikası, emosional intellekt, liderlik, yaradıcılıq… Amma bunu quru siyahı kimi yox, həyatın içindən gələn nümunələrlə izah etdi. O, AI dünyanı dəyişir, amma insanlığı qoruyacaq olanın bizim empati qabiliyyətimiz olduğunu vurğuladı. Həmçinin, dedi ki, hər şey dəyişir, amma dəyişənə uyğunlaşmaq bacarığı dəyişməyən dəyərdir.
Sonunda Asim, “Özünü kəşf et!” deyərək çıxışını bitirdi. Bu tədbir mənim üçün sadəcə bir təqdimat deyil, bir oyanış oldu.
İkinci Spiker: Murad Hümbətov
Forumun ikinci spikeri, Sumqayıt Dövlət Universitetinin Filologiya fakültəsinin 3-cü kurs tələbəsi Murad Hümbətov oldu. O, kütlə qarşısında çıxış etməyin əhəmiyyətini kiçik hekayələr danışaraq izah etdi. “Nitqinlə fərq yarat” mövzusunda çıxış edən Murad, yalnız danışıqdan deyil, göz təması, bədən dili kimi elementlərdən də istifadə etməyin vacibliyini vurğuladı. O, “Nitq üçbucağı” metodunu təqdim edərək bildirdi ki, düzgün göz təması, sözlərin düzgün şəkildə ifadə edilməsi və bədən dilindən doğru istifadə etməklə fərq yaratmaq mümkündür.
Muradın çıxışında diqqət çəkən ən maraqlı məqamlardan biri Böyük Britaniyada qadınların nitqi ilə bağlı aparılan araşdırmalardır. Araşdırmalar göstərib ki, nitq nə qədər düzgün olsa, qadınlar həm şəxsi, həm də peşəkar həyatda daha xoşbəxt olurlar. Murad, təsdiq etdi ki, yaxşı nitq anadangəlmə verilmir və bunun üçün davamlı olaraq metodlardan istifadə etmək lazımdır.
Çıxışını Anton Çexovun “Gözəl nitqə etinasız yanaşan insanlar, özlərini ən ali zövqdən məhrum edirlər” sözləri ilə bitirdi.
Üçüncü Spiker: Nurcan Mirzəyeva
Forumun üçüncü çıxışçısı Bakı Biznes Universitetinin Sosial İş fakültəsinin 1-ci kurs tələbəsi Nurcan Mirzəyeva oldu. Nurcanın çıxışının əsas məqsədi hər kəsin içində gizlənən işığı görüb onu işıqlandırmaq idi. O, gənclərə özlərini ifadə edə biləcəkləri sahələr yaratmağın vacibliyini və rənglərin ruhumuzun dili olduğunu qeyd edərək dedi: “Hər bir gəncin içində bir rəng var – bəlkə sakit mavilik, bəlkə ehtiraslı qırmızı, bəlkə də ümid dolu sarı…” Nurcan, gənclərin bu rəngləri tapıb öz hekayələrini sənət vasitəsilə ifadə etmələrini təşviq etdi.
Dördüncü Spiker: Səbuhi Musayev
Sonuncu spiker, Bakı Biznes Universitetinin İqtisadiyyat və İdarəetmə fakültəsinin 3-cü kurs tələbəsi Səbuhi Musayev oldu. O, “Beyin Köçü” fenomeninə diqqət çəkdi və bunun cəmiyyətimiz üçün nə qədər əhəmiyyətli bir məsələ olduğunu vurğuladı. Səbuhi, gənclərin yalnız daha yaxşı maaş üçün deyil, dəyər verilmədiklərini düşündükləri üçün ölkəni tərk etdiklərini bildirdi. O, bu fenomenin qarşısını almaq üçün yalnız iqtisadi deyil, həm də sosial və psixoloji yanaşmaların lazım olduğunu qeyd etdi.
Səbuhi beyin köçünü dayandırmaq üçün “beyin dövriyyəsi” modelini təklif edərək, gənclərin xaricdə qazandıqları bilik və təcrübələri vətənə geri gətirmək üçün təşviqedici mexanizmlərin önəmini vurğuladı.
Forumun yaradıcı hissəsi
Forumun bədii hissəsində Bakı Biznes Universitetinin yaradıcı gəncləri çıxış etdilər. İqtisadiyyat və İdarəetmə fakültəsinin Sosial İş ixtisası tələbəsi Cəfərova Xatirə, şair və publisist Aysel Fikrətin “Əsgərim” və “Biz döndük” şeirlərini, İqtisadiyyat və İdarəetmə fakültəsinin Sosial İş ixtisası tələbəsi İbrahimova Aytac isə Zəlimxan Yaqubun “İlk andımız son andımız Turandı” şeirini səsləndirdi.
Bundan əlavə, Hüseynzadə Ziya və Bağırov Elvin musiqi nömrələri ilə tədbirə daha da rəng qatdılar.
Təşəkkürlər
Bu layihədə gənclərin potensialını ortaya qoymağı və onların inkişafını dəstəkləyən Bakı Biznes Universitetinin Humanitar Elmlər kafedrasının müəllimi, Filologiya elmləri üzrə fəlsəfə doktoru Reyhan Dadaşovaya təşəkkür edirik. Əməyiniz böyükdür.
Həmçinin layhiyənin rəhbəri REHA Təlim Təhsil Mərkəzinin rəhbəri İlhamə Axundovaya bu cür savadlı, vətənpərvər Azərbaycan gəncliyini bizə tanıtdığı üçün təşəkkür edirik.
