Son bir neçə mövsümdə dizaynerlərin ağlını tamamilə ələ keçirən minimalizm tendensiyası getdikcə sönür. Yeni kolleksiyalarda daha parlaq rənglər, mürəkkəb formalar və maraqlı detallar gözə dəyir. Və bu, yalnız geyimə deyil, həm də aksesuarlara və zərgərlik əşyalarına aiddir. Manjet bilərziklər, iri sırğalar və nəhəng zərgərlik nümunələri 2024-cü ilin yaz-yay mövsümünün əsas zərgərlik trendləridir.
Bu siyahıda boynu əhatəyə alan qalın boyunbağılar xüsusi yer tutur və bir çox markanın kolleksiyalarında müxtəlif versiyalarda qarşımıza çıxır.
Bu bəzək əşyalarını geyimlə necə uyğunlaşdırmalıyıq?
Sadəliyi sevirsinizsə, “Saint Laurent” və ya “Peter Do” kimi lakonik metal modellərə diqqət yetirin. Onlar asanlıqla istənilən görünüşə uyğunlaşacaq və hər gün üçün dəbli seçimə çevriləcəklər. Mirvari və ya mineral daşlardan hazırlanmış boyunbağılar da çox funksionaldır. Onları sadəcə taxmaq kifayətdir ki, ən sadə görünüş belə yeni rənglərə boyansın. Qalın bilərzikləri hər yerə taxmaqdan və hər şeylə uzlaşdırmaqdan çəkinməyinş İstər ciddi iş obrazları, istər romantik libaslarla, istərsə də dostlarınız ilə görüşə gedərkən onları sınayın.
Daha dəbdəbəli variantlar da var. Məsələn, almazdan və ya strazdan hazırlanmış tennis boyunbağılar ziyafət mərasimlərinin atributu olmaqdan çoxdan çıxıb. İndi onu hətta gündüzlər adi bir köynəklə birləşdirə bilərsiniz. Ancaq çox parlaq modellər sizə uyğun deyilsə, rəngli əlavələri olan metal boyunbağıya və ya təbii daşlardan hazırlanan çokerlərə diqqət yetirin. Belə boyunbağılar hətta ən sadə dəsti də dəyişdirəcək və sizin diqqətdən kənar qalmağınıza icazə verməyəcək. Yeri gəlmişkən, bu zinət əşyalarını tək taxmaq vacib deyil. Bir çox moda evlərinin təklif etdiyi kimi, boyunbağını eyni üslubda olan sırğalar, hətta nazik bir çokerlə birləşdirə bilərsiniz. Əsas odur ki, həddi aşmayın, əks halda görüntü həddindən artıq yüklənəcək.
