Oktyabrın 5-i dünya üzrə hər il qeyd olunan Beynəlxalq Müəllimlər Günü  təhsilin inkişafında və cəmiyyətin formalaşmasında müəllimlərin rolunu təntənə ilə qeyd edən xüsusi bir gündür. Bu gün   yalnız bir peşənin deyil, həm də bir həyat yolunun, bir ideyanın bayramıdır. Müəllimlər sadəcə fənn dərsləri keçmirlər. Onlar  gələcəyin qurucuları olan nəsillərin təhsil alaraq həyatlarını doğru yolda yönləndirmə missiyasını daşıyırlar.

Müəllim olmaq çoxyönlü bir sənətdir. Bu peşəyə həyatını həsr edən hər kəs, insanlara bir şey öyrətməkdən daha çox, onlara həyat dərsləri vermək məqsədini güdür. Müəllimlər bilik ötürməkdən əlavə, öyrənməyin həzzini, müstəqil düşüncənin vacibliyini, insanlıq və mədəniyyətin dəyərini şagirdlərinə çatdırmağa çalışırlar. Onlar, məktəbdə öyrədilən hər bir fəndən daha çox, həyatın gerçək təməl dəyərlərini və prinsiplərini dərindən şagirdlərinə anlatmağa çalışırlar.

Müəllimlik təsadüfən  gələn bir əl deyil, bir ilhamdır

Bir müəllimin təsiri ömrü boyu davam edir. O, təkcə məktəb illərində deyil, gələcəkdə insanın qarşılaşacağı çətinliklərdə də şagirdinə rəhbərlik edən bir nümunədir. Həyat boyu unutulmaz olan o bir neçə an, hər zaman bir müəllimin şəxsiyyətindən, verdiyi dərslərdən və əzmkarlığından qaynaqlanır.

Müəllimlərin peşəsi heç də sadə və ya asan deyil. Bir müəllim həm də bir psixoloq, bir dost, bəzən isə bir ailə üzvü kimi şagirdləri ilə əlaqə qurur. Onların güvənini qazanmaq, özünü hörmətli bir şəxsiyyət kimi təqdim etmək, onları doğru yolda yönəltmək – bütün bunlar müasir təhsil sisteminin tələbləridir. Müəllimlər  hər bir şagirdin özünəməxsus xüsusiyyətlərini nəzərə alaraq onların inkişafına dəstək verir, onların fərdi istedadlarını üzə çıxarmağa çalışırlar.

Müəllimlər cəmiyyətin zehniyyətini formalaşdıran quruculardır

Təhsil və müəllimlər hər zaman bir toplumun mədəniyyəti ilə əlaqəlidir. Bir cəmiyyətin inkişafı və modernləşməsi təhsilin keyfiyyəti ilə birbaşa əlaqəlidir. Müəllimlər isə bu inkişafın ən mühüm təməl daşlarıdır. Onlar, hər bir şagirdin təhsil aldığı və böyüdüyü bir cəmiyyətin dəyərlərini, adət-ənənələrini, vətəndaşlıq bilincini aşılamaqda vacib rol oynayırlar.

Ölkəmizdə təhsilin inkişafı və təhsil siyasətinin müasirləşməsi ilə yanaşı, müəllimlərimizin də öz bilik və bacarıqlarını müasir tələblər səviyyəsinə çatdırmaları vacibdir. Müəllimlər  yalnız dərs proqramlarını həyata keçirməkdən ibarət deyil, həm də təhsil metodlarını yeniliklərlə zənginləşdirməli, təhsil şəraitini daha da yaxşılaşdırmalıdırlar. Bu gün hər bir müəllim  öz inkişafını və peşəkar bacarıqlarını artırmağa, ən son yenilikləri izləməyə öhdəlik daşıyır.

Müəllimlərə dəstək: Təhsil sistemi və cəmiyyətin ümumi məsuliyyəti

Müəllimlər günündə onlara təşəkkür edərkən  təhsil sisteminin və cəmiyyətin üzərinə böyük məsuliyyət düşdüyünü unutmamalıyıq. Təhsil siyasətinin və təhsil sisteminin müasirləşməsi yalnız müəllimlərin individual səyləri ilə deyil, dövlətin, məktəbin və bütün cəmiyyətin birgə səyləri ilə mümkün ola bilər. Müəllimlərə verilən qiymət, onlara qarşı göstərilən hörmət və dəstək, cəmiyyətin təhsil səviyyəsinin yüksəlməsində ən vacib amillərdəndir.

Beynəlxalq Müəllimlər Günü təhsil sistemindəki uğurları qeyd etməklə yanaşı, müəllimlərə qarşı cəmiyyətin məsuliyyətini bir daha nəzərə almağa da çağırır. Təhsil sahəsində aparılacaq yeniliklər, müəllimlərə verilən təşviq və dəstək sayəsində uğurlu bir gələcək formalaşa bilər.

Oktyabrın 5-i yalnız bir günün qeyd olunması deyil, müəllimlərimizin bir toplumun, bir millətin gələcəyindəki yerini, əhəmiyyətini və dəyərini bir daha xatırlamaq üçün bir fürsətdir. Bizim işimiz, yalnız bugünün şagirdlərini yetişdirmək deyil, həm də sabahın liderlərini, elm adamlarını, mütəxəssislərini yetişdirməkdir. Müəllimlər, sadəcə öyrədici deyil, həm də inşa edici və istiqamətləndiricidir. Onlar hər zaman yeni başlanğıcların, yeni üfüqlərin arxasında dayanaraq, insanlığın təhsil yolu ilə irəliləməsinə öncülük edirlər.

Bu gün  müəllimlərimizə sonsuz təşəkkürlərimizi və hörmətimizi ifadə etmək borcumuzdur. Təhsil işindəki fədakarlıqları, özlərini şagirdlərinə həsr etmələri və cəmiyyətin inkişafına verdikləri töhfələr, həmişə unudulmaz olacaq. Müəllimlərimizin əzmi və fəaliyyəti sayəsində gələcəyin işıqlı yoldaşları böyüyəcək və bir gün bu cəmiyyətin hər sahəsində öz sözlərini deyəcəklər.

Bir müəllim  nə qədər gənc olsa da, özünün əvəzsiz və həyati rolunu hər zaman dərk etməli, hər gün yeniliklərə açıq, şagirdlərinə hörmətlə yanaşmalı və onlara bir həyat həqiqəti ilə yanaşmalıdır. Bu yolda   hər bir müəllimin ardında güclü bir cəmiyyət və dəstək durmalıdır.

Oktyabrın 5-i hər bir müəllimə olan təşəkkürün, hörmətin və dəyərin simvolu olaraq qeyd edilsin!

İlhamə Axundova

Təhsil eksperti, təlimçi müəllim