Pul təkcə kağız və ya rəqəmsal dəyər deyil. Pul, insanın özünü təhlükəsiz, azad, imkanlı və nəzarətdə hiss etməsini təmin edən bir vasitədir. Psixoloji baxımdan pul:

Öz güvənlə əlaqəlidir: “İstədiyim şeyi ala bilərəm” düşüncəsi özünü dəyərli hiss etdirə bilər.

Nəzarət hissini artırır: Pulun varsa, hadisələrə qarşı daha hazırlıqlı olduğunu düşünürsən.

Əminlik və təhlükəsizlik hissi verir: Xüsusilə qadınlar üçün pul, təcavüzkar münasibətlərdən çıxmaq və öz ayaqları üstündə dayanmaq üçün real gücdür.

Praktiki baxımdan isə pul:

Əsas ehtiyacları (yemək, sığınacaq, səhiyyə və təhsil) təmin etməyə kömək edir.

Yaxşı gələcək planları qurmaq üçün bir vasitədir (təhsil, səyahət, investisiya, öz biznesini qurmaq və s.).

Seçim və azadlıq verir. Pulun varsa, seçim etmə haqqın artır.

Pul haqqında cəmiyyətdən və ailədən aldığımız inanclar

Uşaqlıqdan başlayaraq ailədən və cəmiyyətdən pul haqqında müxtəlif inanclar alırıq. Bu inanclar, həyatımız boyu pul ilə münasibətimizi müəyyən edir:

“Pul hər şeyin başıdır” və ya əksinə “Pul pis şeydir” — bu kimi mesajlar bizim düşüncə sistemimizi formalaşdırır.

“Qadın pul qazanarsa, ərinə hörmət etməz” kimi zərərli stereotiplər, qızların maliyyə azadlığına can atmasını ləngidə bilər.

“Qız uşağı üçün pul yığmaq olmaz, necə olsa evlənəcək” – bu cür yanaşmalar, qadının maliyyə bacarığını və haqlarını dəyərsizləşdirir.

“Pul haqqında danışmaq ayıbdır” — bu cəmiyyət mesajı, qızların maliyyə haqqında açıq düşünməsini və soruşmasını əngəlləyir.

Bu inanclarla üzləşmək və onlardan azad olmaq, maliyyə savadlılığının ilk addımıdır. Seminar zamanı iştirakçılar öz ailələrindən, mühitlərindən aldıqları bu cür mesajları yazaraq və paylaşaraq, bu inancların necə formalaşdığını və onları necə dəyişdirə biləcəklərini anlaya bilərlər.

Pulun qadınların azadlığındakı rolu

Tarix boyunca qadınların azadlığını məhdudlaşdıran əsas səbəblərdən biri maliyyə asılılığı olub. Qadınların:

Öz gəlirlərinin olmaması,

Kişidən asılı maliyyə həyatı yaşaması,

İstəmədikləri münasibətlərdə yalnız “pul yoxdur” deyə qalmaq məcburiyyətində olmaları, azadlıqlarını məhdudlaşdırıb.

Pul, qadın üçün təkcə alış-veriş etmə vasitəsi deyil. Pul:

“Xeyr” demə haqqı verir. Əgər öz gəlirin varsa, istəmədiyin təklifi, münasibəti, təzyiqi rədd edə bilərsən.

Seçim etmək haqqı verir. Harada oxuyacağın, harada işləyəcəyin, necə yaşayacağın barədə qərar vermək gücünü artırır.

Bacarıqlarının dəyərə çevrilməsi üçün fürsət yaradır.

Öz dəyərini hiss etdirmək üçün bir vasitəyə çevrilir – çünki qadınlar yalnız emosional deyil, maliyyə gücü olan fərdlərdir.

Bu mövzu seminarın qadınların güclənməsi ilə bağlı hissəsində xüsusilə vurğulanmalıdır.

Ülviyyə Əfəndiyeva

Ailə və uşaq psixoloqu 

Ailə problemlərinin həlli üzrə ekspert

Beynəlxalq təlimçi