Müasir dövrdə mobil telefonlar gündəlik həyatımızın ayrılmaz bir hissəsinə çevrilib. Lakin bir çox istifadəçinin bilmədiyi bir məqam var: bu cihazlar, əslində, orta hesabla cəmi 3-5 il işləmək üçün nəzərdə tutulur. Bu müddət, xüsusilə texnoloji yeniliklərin sürətli inkişafı fonunda, kifayət qədər qısa görünə bilər. Ancaq əgər istifadəçi smartfonuna diqqətlə yanaşarsa, cihazın ömrünü əhəmiyyətli dərəcədə uzatmaq mümkündür.

Doğru yanaşma ilə smartfon 10 il, hətta daha uzun müddət problemsiz işləyə bilər. Bunun üçün sadəcə bir neçə sadə, lakin vacib qaydalara əməl etmək kifayətdir.

1) Qoruyucu aksesuarlar istifadə edin

Smartfonun mexaniki zədələrdən qorunması üçün ekran qoruyucu şüşə və ya plyonka mütləqdir. Bundan əlavə, telefon qabı (qobura) cihazı çərçivə və arxa hissədən zərbələrə qarşı qorumağa kömək edir. Lakin unutmayın ki, heç bir qoruyucu aksesuar 100 faiz zəmanət vermir. Ən yaxşı müdafiə — cihazdan ehtiyatla istifadə etməkdir.

Telefonun əlinizdən sürüşməməsinə diqqət yetirin.

Onu sərt səthlərə atmayın və cibdən asanlıqla düşə biləcək vəziyyətlərdən qaçın.

Cihazı uşaq və ya heyvanların əlinə keçə biləcək yerlərdə qoymayın.

Qısacası, davamlı diqqət və ehtiyatlı davranış — smartfonun uzunömürlü olmasının əsas şərtidir.

2) Həddindən artıq istilikdən uzaq olun

Smartfonlar istilik və temperatur dəyişikliyinə qarşı olduqca həssasdır. Həddindən artıq qızma cihazın komponentlərinə zərər vurur və batareyanın sürətlə sıradan çıxmasına səbəb olur.

Qorunmaq üçün:

Cihazı birbaşa günəş işığında, xüsusilə yay aylarında, uzun müddət saxlamayın.

İsti səthlərin üzərinə qoymayın (məsələn, noutbuk, soba və ya avtomobil paneli).

Telefonu şarj edərkən istifadə etməkdən çəkinin, çünki bu zaman həm batareya qızır, həm də prosessor yüklənir.

3) Şarj cihazından doğru istifadə edin

Smartfonun enerji dövrəsi onun sağlamlığı üçün həyati əhəmiyyət daşıyır. Buna görə:

Yalnız orijinal və ya yüksək keyfiyyətli şarj cihazlarından istifadə edin.

Əgər orijinal şarj cihazı sıradan çıxıbsa, onun keyfiyyətli alternativini seçin – ucuz və qeyri-sertifikatlı şarj cihazları smartfonun batareyasını zədələyə, hətta cihazın tam sıradan çıxmasına səbəb ola bilər.

Telefonu gecə boyunca fasiləsiz şarjda saxlamaq da tövsiyə edilmir.

4) Cihazın daxili yaddaşını təmiz saxlayın

Smartfonun performansı onun daxili yaddaşının vəziyyətindən birbaşa asılıdır. Tam dolu yaddaş:

Cihazın sürətini azaldır,

Proqramların donmasına və ya gec açılmasına səbəb olur,

Sistemin yükünü artıraraq cihazın tez qızmasına gətirib çıxarır.

Tövsiyələr:

Lazımsız tətbiqləri mütəmadi silin.

İstifadə etmədiyiniz şəkil, video və sənədləri bulud yaddaşına və ya xarici daşıyıcılara köçürün.

Keş (cache) təmizləməyi vərdiş halına gətirin. Xüsusilə mesajlaşma tətbiqləri (məsələn, WhatsApp, Telegram) çoxlu miqdarda müvəqqəti fayl saxlayır.

Yekun olaraq:

Smartfon — yalnız zəng və mesaj üçün deyil, kameralı fotoaparat, video zəng platforması, internet brauzeri və fərdi köməkçi funksiyalarını özündə birləşdirən ağıllı cihazdır. Bu qədər vacib və çoxfunksiyalı bir aləti uzun müddət istifadə etmək üçün bir qədər diqqət və düzgün qulluq kifayətdir.

Qaydalara əməl edin – cihazınız sizi illərlə problemsiz xidmətlə sevindirsin!