Uşaq otaqları onların özlərinə məxsus məkanları olduğu üçün rahat olmalıdır. Düzgün dizayn olunan uşaq otağı onun rahat yatmasını, dincəlməsini, otaqdan zövq almasını, əyləncəli oyunlar oynamasını və keyfiyyətli dərs oxuya bilməsini təmin etməlidir.
Əksər hallarda valideynlər uşaqlarına ayrı otaq ayırmaqda tərəddüd edirlər. Övladını tək qoymaq istəməyən valideynlər onları elə öz otaqlarında yerləşdirirlər.
Bəzən isə valideynlər otağın gözəl görünməsi üçün onu lazım olandan çox “bəzəyirlər”. Əslində uşaq otağını lazımsız əşyalarla və ya mebellərlə bəzəmək düzgün deyil. Çünki bu, ən azı körpəyə yorucu təsir bağışlayır. Əşyaların nə olmasını anlamayan körpə üçün bu qədər sıx və darısqal otaq bəzəmək də düzgün deyil. Otağın sadə, səliqəli və rahat olması əhval-ruhiyyəyə, insanın psixoloji vəziyyətinə öz təsirini göstərir.
Dizaynerlərin fikrincə, uşaq mebelləri çoxfunksiyalı olmaqla yanaşı, körpələrin rahatlığını və əqli inkişafını da təmin etməlidir. Qeyri-adi üslub, geniş siyirmələr, nərdivanlar, açılıb-bağlanan hissələr həm valideyinlərə rahat mühit yaratmaqda kömək edir, həm də uşaqların oyun oynaya bilmələri üçün kifayət qədər yer qalmasına şərait yaradır. Amma mebel yığcam olmaqla yanaşı, rəngarəng quruluşu ilə də seçilməlidir. Məsələn, maşın formasında olan çarpayıda istənilən azyaşlı böyük həvəslə yuxuya gedər.
Mütəxəssislər qeyd edirlər ki, rənglər insan, əsas da uşaq psixologiyasına xüsusi təsir göstərir. Dizaynerlər tünd olmayan çəhrayı, göy, yaşıl rəngin açıq tonlarına üstünlük verilməsini məsləhət görürlər. Belə rənglər həm rahatlıq bəxş edir, həm də uşaq modasında heç vaxt dəbdən düşmür. Ən əsası isə mebel hissələri ekoloji təmiz və uşaqların sağlamlığına zərər verməyəcək materialdan olmalıdır.
