Xüsusi günlərdə, bayramlarda, ad günlərində övladınıza hədiyyə seçərkən bəzən müəyyən çətinliklərlə qarşılaşa bilərsiniz. Hədiyyə seçərkən hansı hədiyyə övladınızı daha çox sevindirəcək, hansı hədiyyəni alsanız onu sevindirmənizlə yanaşı inkişafına müsbət yönümlü təsirini göstərəcək və s. kimi suallar sizi düşündürürsə qeyd olunanlara diqqət edin.
- Hədiyyə almağınızı xüsusi günə saxlamayın. Öncədən axtarmağınız sizə tələsik qərar verməməniz üçün kömək edəcək.
- Tələsik hədiyyə seçərkən nə alacağınızda çətinlik yaşaya bilərsiniz. Bunu daha rahat və əhvalınızın yüksək olan zamanında etsəniz daha məqsədəuyğun olar.
- Öncədən övladınızın istəklərini müzakirə şəklində öyrənməyə çalışın. Bu üsulla nələri daha çox sevər, nələr onu daha çox sevindirər – bu barədə məlumatlana bilər, hədiyyənizi övladınızın istəklərinə görə seçə bilərsiniz.
- Mağazada hər hansı bir nəyisə övladınız üçün bəyənmisinizsə onu almağa tələsməyin. Bir neçə yerə də baxmağınız sizə daha uğurlu seçim etməyinizə kömək edəcək.
- Hədiyyə alarkən evdə büdcənizə göz gəzdirməniz mağazada çaşqınlığın yaranmasının qarşısını alar.
- Uşaqlar üçün oyuncaqlar əvəzedilməz hədiyyədir. Məlumdur ki, bütün uşaqlar oyuncaq hədiyyə olunmasını çox sevərlər. Övladınıza aldığınız oyuncağın inkişafetdirici olması daha məqsədəuyğun olar.
- Kitab hədiyyə etməyiniz də uşaqlar üçün müxtəlif baxımlardan inkişafetdiricidir. Xüsusi günlərdə kitabın fərqli və uşağın diqqətini çəkəcək şəkildə olmasına, eyni zamanda yaşına uyğun olmasına diqqət edin.
Övladınıza etdiyiniz hədiyyənin bahalı olması deyil, onu sevindirməsi və inkişafına müsbət təsir etməsi önəmlidir.
