Eynəklər yazın əsas aksessuarıdır. Günəş eynəklərinin stil ikonalarının sayəsində sevildiyini desək, yanılmarıq. Məsələn, Odri Hepber hər zaman böyük iri çərçivəli eynəklərdə gəzirdi. Günümüzdə isə Keyt Moss, Miranda Kerr və digərləri onu izləyən paparassilərin kameralarının işıqlarından qorunmaq üçün həmişə günəş eynəkləri taxırlar.
Eynəklər quruluşca sadə görünür, lakin onun indiki modeli illər ərzində formalaşaraq ərsəyə gəlib. Günəşdən qorumaq fikri Roma dövrünə qədər gedib çıxır. İmperator Neron gözü şüadan qorumaq və narahatedici işıqların qarşısını almaq məqsədi ilə ilk dəfə zümrüddən linza istifadə etdiyini deyirlər.
Gözlüyün əsas hissəsi olan optik şüşənin tarixi 4500 il əvvələ gedib çıxır. Qədimdə insanlar optik biliklərə malik idilər. Belə ki, onlar bəzi şüşələrin əşyaların böyütməsini bilirdilər. Buna ən böyük sübut isə Giritdəki qazıntılarda tapılan eramızdan əvvəl mininci illərə aid böyüdücü şüşələrdir.
Əldə olan məlumatlara görə, ilk eynək 1280-cı illərdə İtaliyada hazırlanıb. Başqa bir iddiaya görə, 1287-ci ildə Florensiyada Armati adlı bir rahib teleskop üçün eynək icad edib. Bu icaddan sonra Alessandro Della Spina adlı rahib tərəfindən eynək modelləri yaradılır. Lakin o, eynəklər indiki modellərdən tamamilə fərqli idi.
XIII əsrdə eynəklər ortaya çıxana qədər gözləri zəif olan insanlar iş görə bilmədiyi üçün hətta evdən bayıra çıxmırmışlar. Ona görə də ilk eynəklər uzaqgörməni yaxşılaşdırmaq məqsədi ilə düzəldilirdi. Tarixdən məlumdur ki, XIII-XV əsrlərdə İtaliyada şüşə istehsalı özünün ən yüksək zirvəsinə çatmışdı. İtalyan ustaları dünyada şüşəbişirən, ondan müxtəlif məmulat hazırlayan, onu cilalayan ən mahir sənətkarlar hesab olunurdular. Ustalar müxtəlif əyri səthi olan şüşələrlə işləyərkən onların optik xassələrini də aşkar etmişdilər.
Yaz-yay fəslinin eynək dəbi
Bu ilə qədər ixtira olunan bütün eynək tərzləri dəbdə olacaq. Bu məsələdə dizaynerlər hər zövqə xitab etməyə çalışırlar. “Fendi”, “Prada”, “Сhanel”, “Dolce& Gabbana”, “Moschino”, “Miu Miu”, “Bvlgari”, “Stella McCartney”, “Erdem”, “Ray-Ban”, “Thierry Lasry”, “Markus Lupfer”, “Victoria Beckham”, “Linda Farrow” kimi brendlər qadınların zövqünü oxşamaq üçün əlindən gələni ediblər.
1. Ağ çərçivəli eynəklər: Ötən mövsümdə tez-tez rast gəldiyimiz ağ çərçivəli günəş eynəkləri 2015 yaz-yay aylarında yenə də populyar olacaq modellər arasında yer alır.
2. Böyük çərçivəli eynəklər: Bu mövsüm böyük çərçivəli günəş eynəkləri də dəbdədir.
3. Retro günəş eynəkləri: Retro stili özünü hər yerdə göstərir. Retro günəş eynəkləri keçmiş illəri yada salıb nostalji hisslər yaşadacaq.
4. Oval çərçivəli eynəklər: Oval çərçivəli eynəklər 2015 yaz-yay mövsümündə dəbdə olan modellər arasındadır. Kvadrat üz xətlərinə malik olan xanımlar bu modelləri rahatlıqla istifadə edə bilərlər.
5. Kvadrat çərçivəli eynəklər: Kvadrat çərçivəli eynəklər bu mövsüm xanımların favoritlərindən biridir. Böyük kvadrat çərçivələr olduqca iddialı görünür.
6. Girdə çərçivəli eynəklər: Girdə şüşəli günəş eynəklər ilk çıxdığından bu günə qədər günəş eynəyi sektorunda hər zaman populyarlığını qoruyub saxlaya bilir. Bu eynəklər vaz keçmədiyimiz modellərdən biridir. Girdə çərçivəli eynəklər hər növ üz quruluşuna uyğun gəlir. Üzün ölçüsü ilə çərçivənin böyüklüyünə də diqqət edilməlidir.
Günümüzdə kiçik, girdə şüşə və çərçivələr bir az da böyüyərək populyarlığını hələ də davam etdirir.
7. Yarımçərçivəli eynəklər: Bu günəş eynəkləri indidən populyar olmağa başlayıb. Yarımçərçivəli günəş eynəkləri modapərəst xanımların diqqətini çəkəcək.
8. Ombre təsirli günəş eynəkləri: Saçlardakı, geyimlərdəki ombre dəbi yaz-yay mövsümünün eynək dizaynlarına da təsir edib.
9. Rəngli çərçivələr: Bəzək-düzəyi, əlvan rəngləri sevən xanımlar üçün sevimli, şirin eynəklər təklif olunur. Bol parıltılı çərçivələr özünüzdən əmin xanım imici yaradır. Odur ki, bu eynəklərlə diqqət mərkəzində olmağa hazır olun.
10. Pişik eynəklər: Kəskin baxışların ən təsirli yolu pişik eynəklərdən keçir. Pişik gözlərini xatırladan bu modellərlə iddialı olmaq qaçılmazdır.
11. Pilot eynəklər: Pilot eynəklər klassik modeldir. Pilot eynəklər hər mövsüm bütün brendlərin kolleksiyalarında yer alır. Aynalı eynəklər insana sirli bir cazibə bəxş edir. Sirli cazibədən əlavə, özünə əminlik yaradır. Gözləri göstərmədiyi üçün yorğun günlərin xilaskardır.
Aynalı eynəklər məşhurluğunun zirvəsini 80-cı illərdə yaşayıb. Bu yay həmin məşhurluğunu geri qaytaracağına bənzəyir. Klassik pilot eynəkləri daha aktual olsa da, hər modelin aynalı formasını tapmaq olar. Bu il istənilən rəngdə aynalı eynək tapmaq mümkündür. Dəb ustaları, əsasən, mavi rəngin daha mükəmməl göründüyünü iddia edir. Lakin mavi rəngi xoşlamırsınızsa, dərd etməyin. Belə ki, rəng seçimi çoxdur. Gümüşü, qızılı, çəhrayı, sarı və yaşıl rəngləri seçmək şansınız var.
Dekora gəldikdə, müxtəlif forma və rənglərdə olan straz qaşlar, mozaikalar, gül motivləri yenə də dəbdədir. Vitrinlərdə daha sadə və az romantik bəzəkli eynəklərə də rast gəlinir.
Aytən
publika.az
