Yeniyetməlik yaşına çatan şəxsə vurduğu xəsarətin dərəcəsindən asılı olaraq həbs cəzası verilə bilər. Vəkil Türkel Süleymanlı iki gün öncə azyaşlının yeniyetmələr tərəfindən amansızca döyülməsini əks etdirən videonu şərh edərkən belə dedi.
O qeyd edir ki, 16-18 yaşlı şəxs adam öldürdüyü halda ona 10 ildən artıq həbs verilə bilməz:
“Lakin digər hallarda hansısa məhdudiyyət yoxdur. Yəni kiçik sanksiyalarla bağlı qanunda hansısa məhdudiyyət yoxdur. 20, yaxud da 16 yaşında xuliqanlıq edənin cəzası eynidir”.
“Bu şəxslər hansı maddə ilə ittiham olunmaqlarından asılı olaraq 6 ay, 1-2 il də həbs cəzası ala bilərlər”, – deyə o əlavə edir.
Qeyd edək ki, bu gün sosial şəbəkələrdə Bakıda azyaşlı oğlanın yeniyetmələr tərəfindən döyülməsi ilə bağlı görüntülər yayılıb. Kamera görüntülərindən aydın olur ki, hadisə iki gün əvvəl-avqustun 2-də qeydə alınıb. Şəxsiyyətləri məlum olmayan iki şəxs mağazanın qarşısında oturan azyaşlıya şiddət göstərir, daha sonra telefonla bu kadrları qeydə alırlar.
Qafqazinfo-da yayılan videoda bildirilir ki, bundan sonra uşaq ağlaya-ağlaya evə gedərək hadisəni anasına danışıb və bundan sonra kamera qeydlərinə baxılıb. Daha sonra 102 “Qaynar xətti”nə müraciət edilib.
Maraqlıdır ki, bütün bunlar insanların gözü qarşısında baş versə də, müdaxilə edən olmur. Yalnız sonda həmin azyaşlı məkandan uzaqlaşdırılır.
DİN-in Mətbuat xidmətindən bilidirilib ki, sözügedən hadisədən xəbərdardırlar. Hazırda polis əməkdaşları tərəfindən araşdırma aparılır.
Nigar İsgəndərova
