Hazırda Rusiyada yaşayan müğənni Fədayə Laçın şəxsi həyatında və yaradıcılığında baş verən yeniliklərdən söz açdığı müsahibəni təqdim edirik.

– Neçə müddətdir Rusiyadasınız? Həyatınız, yaradıcılığınız necə keçir? Bakıya dönməyi düşünürsünüzmü?

– Artıq il yarımdır ki, Rusiyadayam. 2020-ci ilin mart ayında İbrahim Borçalı ilə onunla birlik bura Novruz konsertinə gəldik. Konsertdən sonra İbrahim Borçalı geri, vətənə döndü. Həmin vaxt bir neçə toy sifarişi aldım və buna görə bir həftəlik Rusiyada qalası oldum. Lakin 1 həftə ərzində pandemiya ilə əlaqədar sərt karantin rejimi tətbiq edildi, 2 aylıq sərhədlər bağlandı və mən Azərbaycana dönə bilmədim.

2 aydan sonra isə toylara icazə verildi və mən də həyatıma sıfırdan başlayan bir insan kimi burada toylara getməyə,  ailəmi dolandırmağa başladım.

Yaradıcılığıma gəldikdə, yeni gözəl mahnılar yazdırıram. Bu yaxınlarda istedadlı müğənnimiz Pərvin Səfərov mənə yeni “Dostum” adlı mahnını təklif etdi ki, onu birlikdə duet oxuyaq. Mən də Pərvinin istedadına bələd olduğum üçün bu təklifdən imtina etmədim. Beləliklə, duet oxuduq və mahnı tez bir zamanda trendə düşdü. Qeyd edim ki, mahnının sözləri və musiqisi Vüsal İbrahimovundur.

Həmçinin sözləri və musiqisi Elşad Kubinkaya məxsus “Ötdü cavanlıq” adlı mahnıya klip çəkdirdik. Həmin mahnı artıq mənim “Youtube” kanalımda yayımlanır.

Bakıya dönməyi düşünürəm, amma burada həm mənim, həm də oğlumun işləri olduğu üçün hələ ki, buradayıq. İşlərimizi səhmana saldıqdan sonra vətənə geri dönməyi düşünürəm.

Lakin gələcək haqqında heç vaxt dəqiq söz demirəm. Çünki hər şeyi Allah bilir.

– Tez-tez şahidi oluruq ki, bəzi müğənnilərimiz onların Rusiyadakı toy bazarına başqalarının daxil olmasını qıcıqla qarşılayır, ara-sıra barələrində “özlərini məclislərdə yaxşı aparmırlar” kimi ittihamlar səsləndirməkdən çəkinmirlər. Siz də bu cür münasibətlə qarşılaşmısınızmı? Ümumiyyətlə, qazanc dalınca Rusiyaya gələn həmkarlarınız haqqında bu cür fikirlər səslənməsini necə qarşılayırsınız?

– Bakıdan həmkarlarım gələndə, onları burada görəndə çox sevinirəm. Əgər Azərbaycanda toy yoxdursa, onlar qazana bilmirlərsə niyə də gəlib burada qazanmasınlar? Qoy hər kəsin ruzisini Allah versin. Biz istəsək, istəməsək də Allah yaratdığı bəndəsinə ruzi yetirəcək, istər vətəndə, istərsə də qərib ölkədə. Beləliklə, mən həmkarlarımın qazanc dalınca Rusiyaya gəlməsini pis qarşılamıram. Əksinə, hər zaman deyirəm ki, Rusiya çox böyük ölkədir. Nə qədər oxuyanımız çox olsa bu bizim üçün çox yaxşıdır. Təki Azərbaycanın gözəl, istedadlı musiqiçiləri dünyanın hər yerində olsun, eləcə də Rusiyada.

– Oğlunuzla birgə restoran açdığınız haqda xəbərlər yayılmışdı. Bu həqiqətdirmi?

– Bəli, oğlumun restoran açması xəbəri həqiqətdir. Əlbəttə ki, restoranı almamışıq, kirayə tutub, bu cür işlədirik.

– Biz adətən sizin Tacir Şahmalıoğlu ilə birgə duet ifa etməyinizə alışmışdıq. İllər  sonra yeni duet ortağı ilə ortaya çıxmağınız xeyli müzakirə yaratdı. Pərvin Səfərovla duet ortaqlığınız bundan sonra da davam edəcəkmi?

– Pərvin Səfərovla duet ortaqlığımız bundan sonra da davam edə bilər. Çünki Pərvin istedadlı oğlandır. Qarşıda onunla yeni bir mahnı ərsəyə gətirməyi düşünürük.

Ümumiyyətlə, ifaçılar mənə duet təklif edəndə ilk növbədə onun istedadına diqqət edirəm. Əgər istedadı varsa  və yaxud sənətdə yenidirsə, o qədər də tanınmırsa ona dəstək olmaq üçün təklifi qəbul edirəm.

– Dekabrın 1-də sizin dədə-baba yurdunuz Laçının işğaldan azad olunmasının 1 ili tamam olacaq. Çox təəssüf ki, sizi tamaşaçılara ilk Fədayə Laçın kimi tanıdan Məhəbbət Kazımov bu günləri görə bilmədi. Bəs siz doğma yurdunuzu görməyə nə zaman gedəcəksiniz? 44 günlük müharibə başlayanda Laçının da tezliklə azad olunacağını gözləyirdinizmi?

– Nə vaxt icazə verilsə Laçına gedəcəm. Bu ilin iyul ayında vətənə gəlmişdim. Çox can atdım ki, heç olmasa Şuşaya gedim, amma nəsə baş tutmadı. İnşallah, Allah nə zaman qismət edərsə, o zaman gedib Qarabağımızı görərəm.

Bu sevinci bizə bəxş edən Azərbaycanın igid oğullarına, şəhidlərinə Allah rəhmət eləsin, analara səbr versin, qazilərimizə də şəfa versin.

– Hər kəs bilir ki, bir neçə il öncə siz həyatınızı sıfırdan başladınız. Əlbəttə ki, zərif bir qadın kimi bu yükləri daşımağa böyük cəsarət, iradə gərəkir. 44 yaşlı Fədayə Laçın indi həyata hansı baxışlarla baxır? Onun üçün nələr dəyişib, nələr yenə də öz yerində qalıb?

– 44 deyil,  45 yaşlı Fədayə Laçın həyata elə həmin baxışlarla baxır, Allaha güvənərək yaşayır, həyatını da sıfırdan başlayıb. İnşallah hər şey yaxşı olar.

– Yenidən sevib, qadın kimi xoşbəxt olacağınıza inanırsınızmı?

– Qadın kimi heç vaxt xoşbəxt olmadım, heç vaxt da xoşbəxt olacağıma inanmıram…
Xalidə Gəray