Meymunçiçəyi virusu, son dövrlərdə Ümumdünya Səhiyyə Təşkilatı tərəfindən diqqətlə izlənilən bir xəstəlik halına gəlib. Virus, əsasən Afrika bölgəsində yayılıb. Çiçək xəstəliyinin daha yüngül forması olan meymun çiçəyi, insanlar arasında yayıla bilən, lakin nadir hallarda ciddi nəticələri olan bir infeksiyadır. Yəni ehtiyatlı olmalıyıq, amma qorxmağa heç bir əsas yoxdur.

Virus, Orthopoxvirus cinsinə aiddir. Bu virus ilk dəfə 1958-ci ildə meymunlarda aşkar edilib. İnsanlar arasında isə ilk dəfə 1970-ci illərdə Afrika bölgəsində müşahidə edilib. Virusun əsas infeksiya mənbəyi meymunlar, siçanlar və digər kiçik məməlilər olduğu üçün və virus ilk dəfə meymunlarda aşkar edildiyi üçün xəstəliyə Meymun çiçəyi adı verilmişdir.

Virusun göstərdiyi simptomlar, adətən baş ağrısı, əzələ ağrıları, yüksək hərarət,limfa düyünlərinin böyüməsi, dəridə səpgilər və yorğunluqdur. Ən diqqət çəkən simptom isə dəridə meydana gələn səpgilərdir. Bu səpgilər əvvəlcə qırmızı ləkələr, sonra isə içi maye dolu elementlərə çevrilir. Son mərhələdə isə bu elementlər quruyur, qabıqlaşır və tökülür.

Meymun çiçəyi virusunun yayılma yolları ümumilikdə aşağıdakı kimidir:

1) Xəstə insanlarla dəri təması (toxunma, öpüşmə, cinsi əlaqə)

2) Xəstə heyvanların tüpürcəyi, cırmaqlaması, dişləməsi və ya o heyvanın ətinin yeyilməsi

3) Yataq örtükləri, dəsmal kimi xəstə insanın istifadə etdiyi çirklənmiş əşyalarla təmas

4) Uzun müddətli yaxın təmas zamanı tənəffüs damcılarının yayılması (asqırmaq, öskürmək)

5) Hamiləlik və doğuş zamanı, eləcə də doğuşdan sonra anayla uşağın yaxın təması

Virusun müalicəsi əsasən simptomatik olaraq aparılır, yəni ağrı və qaşınmanı azaltmaq, yüksək hərarətə nəzarət etmək və ikincili infeksiyaya qarşı yönəlməlidir. Ciddi yanaşı xəstəlikləri olanlarda, xüsusən də immun sistemi zəif olan şəxslərdə, xəstəxana müalicəsi lazım ola bilər.

Virusdan necə qoruna bilərik?

Əlləri müntəzəm yumaq, virusa yoluxmuş şəxslərlə yaxın təmasdan qaçınmaq, geyimləri və digər əşyaları müntəzəm dezinfeksiya etməklə qabaqlayıcı tədbirlər görə bilərik. Yalnız unutmamalıyıq ki, virus ciddi sağlamlıq problemlərinə yol açmasa da, onun müntəzəm izlənməsi və müvafiq tədbirlərin görülməsi vacibdir. Şəxsi gigiyena və təhlükəsizlik tədbirləri virusun yayılmasının qarşısını almaqda əsas rol oynayır. Sağlam həyat tərzi infeksiyanın ağır fəsadlarının qorunmağa  kömək edəcəkdir.

Nilufər Məmmədova

Həkim Mütəxəssis-İnfeksionist