Bu gün Novruzun üçüncü çərşənbəsi olan Yel çərşənbəsidir. Yenə də xanımlar biş-düş düşünür, iki qat bayramı xüsusi qeyd etmək istəyirlər. Ona görə də, sizi çox da əziyyətə salmamaq üçün yenə də bir-birindən dadlı üç resept təqdim edirik.
“Göbələkli bəh-bəh”
Ərzaqlar
Göbələk – 300 qram
Toyuq filesi – 300 qram
Baş soğan – 1 ədəd
Qaymaq – 50 qram
Holland pendiri – 60 qram
Bitki yağı
Duz, istiot
Hazırlanması
Toyuq filesi samanvari doğranıb yağda qovrulur, üzərinə yarımhalqa doğranmış soğan, göbələk əlavə edilir, duz, istiot səpilir. Qovrulan ərzaqların üzərinə qaymaq qatılıb istiyədavamlı şüşə qaba yığılır. Yeməyin üzərinə sürtgəcdən keçirilmiş holland pendiri səpilib 200 dərəcəyədək qızdırılmış sobada pendir əriyənə qədər bişirilir.
Şabalıd souslu salat
Ərzaqlar
Toyuq filesi – 150 qram
Rəngli bolqar bibəri – 3 ədəd
Pomidor – 2 ədəd
Xiyar – 1 ədəd
Duz, istior
Sousu üçün
Şabalıd – 200 qram
Cəfəri – 2 dəstə
Bitki yağı – 200 ml
Hazırlanması
Şabalıd çərtilir, pörtlədilib qabıqdan təmizlənir. Üzərinə cəfəri və bitki yağı əlavə edilib blenderdən keçirilir. Bu salatın sousudur. Toyuq filesi bişirilir və samanvari doğranılır. Bolqar bibəri, pomidor və xiyar samanvari doğranıb filenin üzərinə əlavə edilir. Salata şabalıd sousu, duz və istiot əlavə edilib qarışdırılır.
Kəsmikli “Üçqulaq”
Xəmir üçün
Un – 2 st.
Kərə yağı – 100 qr
Su – 1 st.
Duz – 1 çimdik
İçlik üçün
Kəsmik – 100 qr
Qızartmaq üçün
Bitki yağı
İçliyin hazırlanması
Kəsmik çəngəllə əzilir.
Xəmirin hazırlanması
Ələnmiş una yumurta, otaq istiliyində yumşaldılmış kərə yağı, duz, istiot və su əlavə edilir. Bərk xəmir yoğrulur. Xəmir yayılıb dördkünc formada kəsilir, içinə kəsmik qoyulub üçbucaq şəkildə bükülüb bitki yağında qızardılır. “Üçqulaq” süfrəyə xama ilə birlikdə verilir.
Nuş olsun!
Təqdim etdi: Məsudə Sultan
