mekteb

Valideynlərin “8 mart” problemi

Baxış sayı: 291

8 Mart – Beynəlxalq Qadınlar günü yaxınlaşır. Artıq illərdir ki, bu əlamətdar günə orta məktəblərdə “xüsusi hazırlıq” görülür. Valideynlər müəyyən məbləğdə pul yığaraq qadın müəllimləri təbrik edirlər. Məgər təbrik ancaq beləmi olmalıdır? Nədir bu tendensiyanın səbəbi? Niyə valideynlər məcbur qalıb övladlarının boğazından kəsərək müəllimlərə pul verməlidirlər?

 

Məsələ ilə bağlı danışan jurnalist- sosioloq Lalə Mehralı deyir ki, bu “ənənənin” əsasını elə valideynlər qoyublar:

“Bu mövzu hər il müzakirə olunur. Hamı bilir ki, konkret məsələdə həmişə valideynlər təşəbbüs göstərirlər. Əlbəttə, müəllimi bir buket güllə də təbrik etmək mümkündür. Lakin ortabab buketin qiymətinin 30 manat olduğunu nəzərə alsaq, valideynlər bu, varianta üstünlük vermirlər. Çünki gül ən çoxu bir neçə gündən sonra solur və atılır. Ona görə də valideynlər həmin pulu konvertdə müəllimə təqdim etməyin daha yaxşı  olduğunu düşünürlər. Bir ana kimi mən də fikirləşirəm ki, nəticədə müəllimin övlada olan diqqəti daha da artır. Lakin jurnalist və sosioloq kimi tam əks mövqedəyəm. Gərək müəllimlərin maaşları kifayət qədər çox olsun ki, onlar valideynlərdən heç nə gözləməsinlər”.

 

 

Sosioloq: “Əlbəttə, müəllimlərə kitab, ətir və ya gül buketi də hədiyyə etmək olar. Amma gəlin, görək, bütün müəllimlər kitabı, gülü qəbul edirlərmi?”

Hədiyyənin böyüyü, kiçiyi olmadığını deyirlər. Amma, deyəsən, bu misal orta məktəb müəllimlərinə aid deyil. Sosioloqun fikrincə, əlamətdar günlərdə müəllimlərə pul vermək artıq bir növ dəb halını alıb:

“Əlbəttə, müəllimlərə kitab, ətir və ya gül buketi də hədiyyə etmək olar. Amma gəlin, görək, bütün müəllimlər kitabı, gülü qəbul edirlərmi? Əfsuslar olsun ki, yox. Ona görə də imkanı olan valideynlər müəllimlərə pul verirlər. Öz ailəsini zorla dolandıranlar da “qonşudan geri qalma” prinsipi ilə bu addımı atırlar. Əks halda müəllimlərin onların övladlarını, necə deyərlər, gözüm çıxdıya salacaqlarını bilirlər”.

Müşahidələr göstərir ki, müəllimlər üçün pul yığılanda valideyn komitəsinin sədri xüsusi “canfəşanlıq” göstərir. Nə üçün hər valideyn özü fərdi qaydada müəllimi təbrik etmir? Bu suala cavab verən jurnalist artıq vəziyyətin nisbətən düzəldiyini deyir:

“İnid elə vəziyyət yaranıb ki, hər valideyn müstəqil qaydada müəllimlə üsniyyətə girə bilər. Lakin məsələ ondadır ki, valideynlərin imkanı, zövqü eyni deyil. Müəllimlər də bir çox hədiyyəni bəyənmirlər. Bu səbəbdən də valideynlər məcbur olub eyni miqdarda pul yığaraq vahid qərar verirlər. Bu iş isə valideynlər komitəsinin sədrinə həvalə olunur”.




Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir