Sağlam Cəmiyyət İctimai Birliyinin sədri, sosioloq Lalə Mehralı Feysbuk hesabında məktəbəqədər hazırlıq qruplarına aid maraqlı paylaşım edib. Sosioloq xanım bildirib ki, məktəbəqədər hazırlıq qruplarına qəbul 5 yaşda edilir. Yəni bu il valideynlər 2015 təvəllüdlü uşaqları qeydiyyatdan keçirə bilər:
“Qızım 2014 təvəllüddür, 6 yaşı iyulda oldu. Məktəbə 7 yaşında qoymağı planlamışıq, marta qədər bağçaya gedib. İndi isə qızımı məktəbəqədər qrupa yazdıra bilmərəm. Çünki qruplarda 5 yaşlılar olacaq, sistem 2014-cü il təvəllüdlü uşağı qəbul etmir”.
Dünəndən etibarən məktəbəhazırlıq qruplarına onlayn qeydiyyat başlanıb. Mart ayında isə pandemiyaya görə bağçaların bağlanması indiki halda bir çox uşağın məktəbəhazırlıq qruplarına yazıla bilməməsinə səbəb olur.
Vəziyyətlə əlaqədar danışan tarix elmi üzrə fəlsəfə doktoru, təhsil eksperti Kamran Əsədov bildirir ki, yeni təhsil qanununa görə, orta ümumtəhsil mətkəblərinin 1-ci sinifinə həmin tədris ilində 6 yaşı olmuş şəxslər gedirlər:
“Yəni 2020-ci ildə orta ümumtəhsil məktəblərinin 1-ci sinifinə 2014-cü ilin dekabrın 31-nə qədər anadan olmuş şəxslər daxil olur. Hətta həmin tədris ilinə qədər 8 yaşı olmuş şəxslər də gedə bilər. Amma məktəbəhazırlıq qruplarına həmin tədris ilində 5 yaşı tamam olanlar qəbul olunur. Bu gündən etibarən məktəbəhazırlıq qruplarına qeydiyyat başlayıb.
Qeydiyyatdan yalnız 2015-ci ildə doğulmuş şəxslər keçə bilər. Məktəbəqədər hazırlıq qrupları dövlət tərəfindən ödənişsiz aparılır. Bu uşaqlar növbəti il 1-ci sinifə gedəcəklər. Ona görə icazə verilmir ki, yaşı 5-dən aşağı olan şəxslər bu qruplara qoşulsun”.
Ekspert vurğulayır ki, məktəbəhazırlıq qruplarında verilən biliklər yalnız 5 yaşlı uşaqların psixologiyasına və yaş xüsusiyyətinə aiddir:
“6 yaşlı uşaqlar üçün artıq məktəb başladığına görə onlar birmənalı şəkildə digər biliklərə yiyələnməlidirlər. Bu, dünya təcrübəsində də belədir.
Azərbaycanda körpələr evi və uşaq bağçaları 1 yaşdan 5 yaşına qədər nəzərdə tutulur. 5 yaşda 6 yaşa qədər uşaqlar məktəbəhazırlıq qruplarına, 6 yaşdan yuxarı olanlar isə ibtidai siniflərə getməlidir.
Ona görə deyə bilmərik ki, “övladımın 6 yaşı var, məktəbəhazırlıq qrupuna getsin”. Kimsə övladının 6 yaşında yox 7 yaşında məktəbə getməsini istəyirsə, uşağı fərdi qaydada özəl təhsil müəssisələrinə cəlb edib fərdi məktəbəhazırlıq qruplarına yazdıra bilər.
Amma dövlət tərəfindən həyata keçirilən strategiya üzrə 5 yaşlı uşaqların məktəbəhazırlıq qruplarında, 6 yaşlı uşaqların isə orta məktəbdə ibtidai sinifdə oxumağı tövsiyə edilir”.
