Semaqlutid əsaslı preparatlar artıq təkcə arıqlama vasitəsi kimi deyil, asılılıqlarla mübarizədə mümkün yardımçı alət kimi də gündəmə gəlməkdədir.
ABŞ və Avropada aparılan klinik müşahidələr semaqlutid qəbul edən bəzi pasiyentlərdə alkoqol istehlakının azaldığını, nikotinə meylin isə zəiflədiyini göstərir.
Mütəxəssislər bu təsiri preparatın beynin “mükafat sistemi”nə təsiri ilə izah edirlər. Məhz həmin neyron mexanizmlər həm həddindən artıq qida qəbulunda, həm də alkoqol və nikotin kimi asılılıqların formalaşmasında əsas rol oynayır.
Araşdırmaçılar vurğulayırlar ki, semaqlutid birbaşa asılılıqların müalicəsi üçün yaradılmayıb. Alkoqol və siqaretə marağın azalması hazırda daha çox əlavə, müşayiətedici effekt kimi qiymətləndirilir. Buna baxmayaraq, bu istiqamət elmi dairələrdə ciddi maraq doğurur və genişmiqyaslı tədqiqatlar davam etdirilir.
Rusiyada artıq bu aktiv maddə əsasında hazırlanmış yerli preparat — “Velgiya EKO” mövcuddur. Lakin mütəxəssislər ehtiyatlı mövqe tutur və bildirirlər ki, semaqlutidin asılılıqlara qarşı potensial istifadəsi ilə bağlı qəti elmi nəticələr yalnız 2026-cı ildə başa çatacaq böyük beynəlxalq araşdırmalardan sonra açıqlana bilər.
Həkimlər xatırladırlar ki, bu tip preparatlar yalnız tibbi nəzarət altında qəbul olunmalıdır və hələlik asılılıqların müalicəsində rəsmi alternativ hesab edilmir.
