Səhərlər açılır, günlər bir-birini əvəz edir və bəzən elə bil zaman bizdən xəbərsiz sürət alıb gedir. Hər gün eyni ssenari: eyni saatda oyanmaq, eyni yollarla gedib-gəlmək, eyni insanlarla eyni söhbətləri etmək… Belə davam etdikcə, həyat tədricən bir növ təkrarlar silsiləsinə çevrilir. Əgər siz də bu hissləri yaşayırsınızsa, unutmayın – bu döngüdən çıxmaq sizin əlinizdədir. Bəzən kiçik dəyişikliklər belə böyük fərqlər yarada bilər. Elə isə gəlin, həyatınızı daha maraqlı və mənalı etmək üçün 7 sadə, amma təsirli tövsiyəyə nəzər salaq.
Günlərinizin gedişatı çoxdan əvvəlcədən yazılmış bir ssenariyə çevrilibsə, bu ritmi pozmağın vaxtıdır. Hər gün etdiyiniz işlərə bir fasilə verin. Məsələn, hər dəfə getdiyiniz yollardan fərqli marşrutlar seçin, yeni yerlər kəşf edin. Əgər axşamlar evdə keçirməyə öyrəşmisinizsə, bir gün bu saatlarda açıq havada gəzin, yeni bir kafedə oturun və ya sadəcə təbiətlə təmas qurun. Həyata yeni baxış bucaqları əlavə etmək üçün bəzən kiçik sarsıntılar kifayətdir.
Həyatda insanı ən çox sevindirən hisslərdən biri də kiməsə faydalı olduğunu bilməkdir. Sosial məsuliyyət daşıyan layihələrdə könüllü olaraq iştirak etmək, ehtiyacı olanlara yardım əli uzatmaq həm ruhunuzu qidalandıracaq, həm də mənəvi zənginlik gətirəcək. Həmçinin heyvan sığınacaqlarında, uşaq evlərində və ya ətraf mühitlə bağlı layihələrdə iştirak etmək, sizin üçün həyatın yeni və daha dərin bir tərəfini açacaq.
Hobbilər yalnız vaxt keçirtmək vasitəsi deyil – onlar sizin daxili dünyanızın güzgüsüdür. Rəsm çəkmək, rəqs, musiqi, dil öyrənmək və ya bağçılıq kimi maraqlı fəaliyyətlər sizi həm rahatladacaq, həm də ruhunuzu doyuracaq. Üstəlik, bu sahələrdə yeni insanlarla tanış olaraq həyatınıza yeni dostlar, bəlkə də yeni imkanlar əlavə etmiş olacaqsınız.
Hər bir insanın yaşadıqları, keçirdiyi duyğular və topladığı təcrübələr bir roman qədər dəyərlidir. Öz həyatınızı yazıya tökərək həm keçmişi daha yaxşı anlayar, həm də gələcək üçün güclü bir motivasiya əldə etmiş olarsınız. Özünüzə “Haradan başlamışdım?” və “Hara gəlmişəm?” suallarını vermək, dəyişimi və inkişafı hiss etməyin ən təsirli yollarından biridir.
Bir canlının həyatına sevgi, diqqət və qayğı bəxş etmək insanın daxilindəki ən gözəl hissləri oyadır. Bir pişik və ya it sahiblənmək, yalnız onların deyil, sizin də həyatınıza dəyər qatacaq. Onların saf sevgisi və şərtsiz bağlılığı sizi daha mərhəmətli, daha diqqətli biri halına gətirəcək. Üstəlik, gününüz artıq yalnız sizinlə bağlı olmayacaq – siz bir canlının xoşbəxtliyinə də cavabdeh olacaqsınız.
Əllərimiz daim telefonda, gözlərimiz ekranlarda… Bəzən bu tempə elə alışırıq ki, ətrafımızdakı gözəllikləri, real anları qaçırırıq. Gündə ən azı bir neçə saatı texnologiyasız keçirin. Kitab oxuyun, musiqi dinləyin, yaxınlarınızla ünsiyyət qurun. Bu, həm beyninizi dincəldəcək, həm də emosional bağlarınızı gücləndirəcək.
Hədəflər insanı hərəkətdə saxlayan, ona istiqamət verən təkanlardır. İstər kiçik, istər böyük məqsədlər – onların hər biri həyatınıza yeni bir məqsəd və anlam qatacaq. Özünüz üçün bu gün bir hədəf qoyun və ona doğru ilk addımı atın. Yaxşı nəticələr tədricən gələcək, amma bu prosesin özü sizi daim irəli aparacaq.
Hazırladı: MƏTİN
