Zəfəranlı düyü plovu – yalnız bayram süfrələrinin deyil, həm də gündəlik menyunun ləzzətli bəzəyidir. Bu plov həm ətirli, həm yüngül, həm də gözoxşayan sarı rəngi ilə iştaha gətirən bir yeməkdir. Beləliklə, “Gencaile.az” saytının “Yeməyə nə var?” rubrikasında bu reseptin ən sadə və asan üsulunu sizinlə bölüşürük.
Tərkibi:
1 stəkan uzun düyü
2 stəkan su
1/2 çay qaşığı zəfəran (və ya zəfəranlı su)
1/2 çay qaşığı duz
1 xörək qaşığı duru yağ
1 xörək qaşığı kərə yağı (servis üçün)
Hazırlanması:
Düyünü ilıq suda 20-30 dəqiqə isladın. Bu, onun daha yaxşı bişməsinə və yapışmamasına kömək edəcək.
Kiçik bir stəkanda zəfəranı 2 xörək qaşığı isti su ilə isladın. Rəng və ətir buraxması üçün 10 dəqiqə saxlayın.
Qazana 2 stəkan su tökün, duz və duru yağı əlavə edin. Su qaynayan zaman isladılmış düyünü süzün və qazana əlavə edin.
Qapağını örtün və orta odda suyun buxarlanmasını gözləyin. Su çəkildikdə zəfəranlı suyu üzərinə gəzdirin.
İstiliyi minimuma salın və qapağın altına dəsmal qoyaraq 10-15 dəqiqə dəmləyin.
Süfrəyə verərkən kərə yağı əlavə edin və yumşaqca qarışdırın.
Bu plov təkbaşına da, müxtəlif ət yeməkləri ilə birlikdə də servis edilə bilər. Zəfəranın özünəməxsus ətri və düyünün zərif toxuması birləşərək həm gözə, həm damağa xitab edir.
Hazırladı: İlahə Atəş
