“2020-ci il yanvarın 1-dən provayderlər “halal internet” adlandırılan filtrlənmiş internet xidməti göstərməyə, televiziyalar isə verilişlərə yaş məhdudiyyətinin tətbiqinə hazır olmalıdır”.
Bu barədə “Multimedia” İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz məlumat verdi. Mütəxəssis bildirir ki, gələn ilin ilk günündən “Uşaqların zərərli informasiyadan qorunması haqqında” qanun qüvvəyə minir:
“Bu qanuna uyğun olaraq “Telekommunikasiya haqqında” qanuna da əlavələr edilib. Bu əlavəyə görə hər bir provayder abunəçinin istəyi ilə uşağın internetdə zərərli informasiyadan qorunması üçün imkanlar yaratmalıdır.
Yəni, bütün provayderlər təmiz, “halal internet” xidməti üçün hazırlıqlar görməlidir”.
Osman Gündüz qeyd edir ki, əgər valideyn “halal internet” istəyirsə, provayderlər gələn ildən bu xidməti təqdim etməyə borclu olacaq:
“Təbii ki, bu məqsədlə provayderlər öz sistemlərində filtrasiya (süzgəc) sistemi qurmalıdırlar. Hazırda ölkənin təhsil sistemində bu tip süzgəc sistemi fəaliyyət göstərir”.
Ekspertin sözlərinə görə, adıçəkilən qanunvericiliyə görə, gələn ildən televiziyalarda yayımlanan hər bir informasiya məhsulu yaş kateqoriyalarına görə (6-, 6+ , 12+,16+, 18+ ) işarələnməlidir:
”Hər işarəyə uyğun olan informasiya məhsullarının yayımlanmasına bəlli bir vaxt məhdudiyyətləri tətbiq olunacaq. Televiziya kanalları indidən buna hazır olmalıdırlar. İndiyədək kanallarda formalaşan informasiya məhsulları ekspertizadan keçirilməli və ya yaşa görə işarələnməlidir.
Eyni zamanda, adıçəkilən qanuna görə, internet media qurumları da informasiya məhsulunun uşaqlar arasında yayılmasını məhdudlaşdıran xəbərdarlıq mətnlərini yerləşdirməyə hazır olmalıdırlar”.
