“Daimi susuzluq hissi maddələr mübadiləsi pozğunluqları və mədəaltı vəzi ilə bağlı problemlərin əlaməti ola bilər.”
Bu sözləri Mayomed Fizioterapiya və Reabilitasiya Klinikasının baş həkimi, həkim-terapevt, ailə hıkimi Nərminə Abbasova deyir.
Mədə-bağırsaq traktı xəstəlikləri susuzluq hissi yarada bilər, həmçinin diabet və ya kəskin intoksikasiya zamanı da orqanizm su tələb edə bilər.
“Susuzluq mədə-bağırsaq traktının və onun yuxarı hissələrinin işi ilə əlaqəli əksər problemlərin göstəricisidir. Bunun öd və ya aclıq hissindən də qaynaqlanması mümkündür. Və ən əsası, susuzluq intoksikasiyanın varlığından xəbər verə bilər. Bütün bunlar su içmək istəyini yaradır”, – deyə terapevt xəbərdarlıq edir.
Həkim qeyd edir ki, daimi susuzluq zəhərlənmənin də ilkin əlaməti ola bilər, belə ki, bu yolla orqanizm zəhərli maddələrdən xilas olmağa çalışır. Bu vəziyyətdə təmiz sərin suya üstünlük verərək bol maye qəbul etmək tövsiyə olunur.
