Müasir dövrdə qidalanma ilə bağlı müxtəlif yanaşmalar mövcuddur və çörək bu yanaşmaların çoxunda diqqət mərkəzindədir. MayoMed Medikal Fizioterapiya və Reabilitasiya Mərkəzinin təsisçisi və baş həkimi, terapevt, ailə həkimi Nərminə Abbasova çörək istehlakının sağlamlıq üzərindəki təsirləri barədə “Gencaile.az” saytına verdiyi açıqlamada çörəkdən imtina məsələsini müzakirə etdi.

Nərminə Abbasova bildirir ki, çörək, xüsusilə də ağ çörək, yüksək karbohidratlar və şəkər tərkibli olması səbəbindən bəzi insanlar üçün sağlamlıq problemlərinə yol açabilir: “Ağ çörək qan şəkərinin sürətli qalxmasına səbəb ola bilər və bu da insulin səviyyəsinin artmasına yol açır. Bu, xüsusilə şəkərli diabet və artıq çəki ilə bağlı problem yaşayan insanlar üçün risklidir.”

Həkim qeyd edir ki, ağ çörəkdən tamamilə imtina etmək yerinə, tam taxıl çörəyinə keçid daha faydalı ola bilər: “Tam taxıl çörəyi, ağ çörəyə nisbətən daha az işlənmiş və daha yüksək lif tərkibinə malikdir. Bu çörək növü qan şəkərinin tədricən yüksəlməsinə kömək edir, bu da daha sağlam bir seçimdi.”

Nərminə Abbasova çörəkdən tamamilə imtina etməyin hər kəs üçün uyğun olmadığını vurğulayıb: “Bəzi insanlar üçün çörəkdən tamamilə imtina etmək düzgün seçim olmayabilir. Çünki çörək, xüsusilə də tam taxıl çörəyi, bədənin ehtiyac duyduğu bəzi qida maddələri ilə təmin edir. Bununla yanaşı, düzgün miqdarda və balanslı şəkildə istehlak edildikdə, çörək bədənə zərər vermir.”

Həkim, çörəyin pəhrizlərdə necə istifadə ediləcəyinə dair tövsiyələrini də təqdim edib: “Əgər insanın məqsədi çəki itirmək və ya sağlam qidalanmaqdırsa, ağ çörəkdən imtina edib, tam taxıl çörəyini istehlak etməsi tövsiyə olunur. Ayrıca, gün ərzində çörək miqdarını məhdudlaşdırmaq və balanslı qidalanma proqramına riayət etmək daha yaxşı nəticələr verə bilər.”

Nərminə Abbasova, çörək istehlakının tamamilə qadağan edilməsi məsələsinin tibb mütəxəssisləri arasında mübahisəli bir mövzu olduğunu qeyd edib: “Çörək bədənin ehtiyacı olan bəzi qida maddələrini təmin etsə də, miqdarı və növü çox önəmlidir. Yəni, balanslı bir şəkildə çörək yemək, sağlam həyat tərzi üçün daha yaxşı bir yanaşmadır.”

Bu cür bir yanaşma ilə, çörəkdən imtina etməyi düşündüyünüz zaman, bunu diqqətlə və sağlam qidalanma prinsipinə uyğun olaraq planlaşdırmaq vacibdir.