“Gencaile.az” saytının “Yeməyə nə var?” rubrikasında bu gün sizə Düyü sıyığı (südlü düyü) reseptini təqdim edəcəyik.
Tərkibi:
1 stəkan yumru düyü;
1 litr süd;
2 stəkan su;
2 xörək qaşığı şəkər tozu (zövqə görə azalda və ya artıra bilərsiniz);
1 çimdik duz;
1 xörək qaşığı kərə yağı (istəyə görə);
Darçın və ya vanil (əlavə ləzzət üçün, istəyə bağlı).
Hazırlanması:
İlk olaraq düyünü yaxşıca yuyub süzgəcdən keçiririk. Qazanda 2 stəkan suyu qaynadıb yuyulmuş düyünü əlavə edirik. Orta odda, suyu çəkilənə qədər qarışdıraraq bişiririk.
Düyü şişib yumşaldıqdan sonra üzərinə südü əlavə edirik və qarışdıraraq bişirməyə davam edirik. Bu zaman qarışımı tez-tez qarışdırmaq vacibdir ki, dibi tutmasın.
Süd qaynamağa başladıqda şəkər tozu və bir çimdik duz əlavə edilir. İstəyə görə bu mərhələdə kərə yağı da əlavə etmək olar – sıyığın dadı daha yumşaq və krem kimi olur.
Sonda vanil və ya darçın əlavə edib ocağı söndürürük.
Südlü düyü sıyığı isti də, soyudulmuş şəkildə də servis edilə bilər. Xüsusilə uşaqlar üçün həm qidalandırıcı, həm də yüngül bir yeməkdir.
Nuş olsun!
Təqdim etdi: İlahə Atəş
