Milli-mənəvi dəyərlərimizdən danışanda ağlımıza gələn ilk ünvan ailə olur. Həqiqətən də, ailə-məişət qanunlarımız əsrlər boyu arına-arına, cilalana-cilalana formalaşıb. Bu qanunların təməlində isə fədakarlıq anlayışı aparıcı amil olub. Yəni, ailə quran fərdlər bir-birilərinin hər əzabına, hər əziyyətinə qatlaşıblar. Ona görə də, əsrlər boyu ailənin dağılması böyük bir fəlakət kimi qarşılanıb. Ancaq çox təəssüf ki, son dövrlərdə mənəviyyatımızın digər sahələrində olduğu kimi ailə-məişət münasibətlərimizdə də ciddi aşınmalar müşahidə olunur. Artıq ailə fərdləri arasında o əvvəlki fədakarlıqdan əsər-əlamət yoxdur. Necə deyərlər, hamı özünü haqlı sayır və heç kim öz haqqından keçmək istəmir. Ən dəhşətlisi isə artıq ailə anlayışının özü də mahiyyətini dəyişir. Üstəlik bu, get-gedə daha sürətlə yayılmağa başlayır. Nəticədə, “yeni” ünsiyyətlər, “yeni” münasibətlər formalaşır. Az qala tərəflərdən heç biri öz boynuna məsuliyyət götürmək istəmir. Nə sevginin, nə səmimiyyətin təravəti qalır. Hisslərin, duyğuların qarşısında az qala dərin bir uçurum meydana gəlir. Təbii ki, bu halların yayılmasında bu sahəyə “yönəlmiş” teleserialların və teleproqramların da rolu az olmur. Bu isə milli-mənəvi gözəlliklərimizin (dolayısı ilə mentalitetimizin də) ciddi fəlakətlə üz-üzə qaldığını göstərir. Az qala ailədə tərəflər bir-birilərinə müvəqqəti yol yoldaşı kimi baxırlar. Təbii ki, belə olan halda bu ailənin sona qədər uzanma ehtimalı da azalır. Bu cür ailələrdə doğulan uşaqların da aqibəti, demək olar ki, ürəkaçan olmur. Başqa sözlə, belə uşaqların bu gün doğulduqları ailələrdə yaşadıqları problemlər sabah qurduqları ailələrdə də davam edir. Beləliklə, bu ailələr bir az da irsi problemlər üzərində qurulur. Halbuki ailə dediyimiz şey müqəddəs anlayışdır. Və həqiqi ailənin nə olduğunu bilənlər üçün ailə bir cənnət bağçasıdır. Ona görə də, nə olursa-olsun, ailənizə sahib çıxın və onun “solmasına” imkan verməyin. Bu yolda atdığınız hər bir addımın fədakarlıqdan keçdiyini də unutmayın.
Ölkəmizdə gənclərə, gənc ailələrə dövlət səviyyəsində diqqət və qayğı ildən-ilə artırılır, gənc ailələrin sosial problemlərinin həllinə diqqətlə yanaşılır. Gənclərin problemlərinin həllinə yönəlik, eləcə də gənclərin inkişafının stimullaşdırılmasına hesablanmış proqramlar, çoxsaylı layihələr həm də gənc ailələrin problemlərinin həllini təşviq edir.