Bu gün Novruzun ilk müjdəçisi Su çərşənbəsini qeyd edirik. Təbii ki, belə xüsusi günlərdə ailə bir süfrə başına yığışır, masaya dadlı təamlar düzülür. Həmişə də biz xanımlar bayramlarda, xüsusi günlərdə nəsə dadlı, fərqli masa hazırlamaq istəyirik. Biz də sizə həm milliyi qorumaq, həm də ki, fərqli təamlar hazırlamaqda kömək etmək üçün iki bir-birindən dadlı resept təqdim edirik.
Tonqal salatı
Ərzaqlar
Kartof – 2 ədəd
Yumurta – 2 ədəd
Kök – 2 ədəd
Toyuq filesi – 250 qr
Kərə yağı – 50 qr
Qara qavalı qurusu (tumsuz) – 50 qr
Qoz ləpəsi – 50 qr
Mayonez, xama – 300 qr
Duz, istiot
Hazırlanması
Kartof, kök, yumurta və toyuq filesi bişirilir. Qara gavalı samanvari doğranır. Mayonez xama ilə qarışdırılır. Kartof, kök, yumurta və kərə yağı sürtgəcdən keçirilir. Ərzaqların aralarına mayonez-xama qarışığı çəkilir, duz və istiot vurulub bu qayda ilə salat buluduna yığılır: kartof, yumurta, kök, toyuq filesi, kərə yağı, gavalı. Eyni prosesi ərzaqlar bitənə qədər təkrar edirsiniz. Salatın üzərinə mayonez-xama qarışığı çəkilir, üyüdülmüş qoz ləpəsi və qara gavalı qurusu ilə bəzəyirsiniz.
Toyuq filesindən ləvəngi
Ərzaqlar
Toyuq filesi – 400 qr
Baş soğan – 3 ədəd
Qoz ləpəsi – 300 qr
Zoğal – 100 qr
Lavaşana – 50 qr
Mayonez – 50 qr
Tomat pastası – 2 x.q.
Bitki yağı, duz, istiot
Hazırlanması
Ləvəngi: Baş soğan ətçəkən maşından keçirilir, acı suyu çıxarılır. Üzərinə ətçəkən maşından keçirilmiş qoz ləpəsi, lavaşana əlavə edilir, duz, istiot səpilib qarışdırılır. Pomidor sousu: Xırda doğranmış pomidor, zoğal, tomat pastası yağda qovrulur, üzərinə duz, istiot səpilib qarışdırılır. Toyuq ətinin filesi üç yerə bölünüb strec arasına yığılır, döyəclənir, duzlanır, istiotlanır, üzərinə ləvəngi əlavə edilib rulet şəklində bükülür. Hazır ruletlərin üzərinə mayonez çəkilib saxsı qaba yığılır. Toyuq ləvəngisinin üzərinə pomidor sousu, pomidor dilimləri, zoğal dənələri və qoz ləpəsi əlavə olunub 180 dərəcəyədək qızdırılmış sobada bişirilir.
