60 il bundan öncə, Fridrix Flikin xahişi ilə Daimler şirkəti Auto Union şirkətinin səhmlərinin nəzarət paketini əldə edib. Məlum olduğu kimi, o zaman Auto Union şirkəti Horch, Audi, DKW və Wanderer markalarının sahibi idi. Şirkətin dörd üzükdən ibarət olan emblemi məhz buna işarə edirdi. Hər iki şirkətin ən iri səhmdarı olan Flik, öz nüfuzundan istifadə edərək onların birləşməsini istəyirdi. O, şirkətlərin bir-birini tamamlayacaq modellərinin olduğundan əmin idi.
Daimler-Benz AG ilkin olaraq Auto Union şirkətinin səhmlərinin 88 faizinə sahib olsa da, 1959-cu ildə Yeni il ərəfəsində şirkətin səhmlərin qalan hissəsini də satın alıb. Səhmlərin satışından əldə edilən maliyyə vəsaitlərindən istifadə edən Auto Union İnqolştadtda yeni zavodun inşasına başlayaraq, bütün istehsal günücü orada cəmləşdirmək qərarına gəlib. Bundan başqa, Daimler şirkətindən alınmış 340 milyon alman markası Auto Union modellərinin modernləşdrilməsinə yönəldilir.
Üstəlik, Daimler istedadlı mühəndis Lyudviq Krausu komandası ilə bilikdə İnqolştadta göndərir. Lyudviq özü ilə birlikdə Auto Union şirkətinə M 118 dörd silindrli mühərrikini də gətirmişdir. Bu Auto Union üçün göydəndüşmə bir hadisə olmuşdur, çünki o zaman şirkət yalnız iki taktlı mühərriklər istehsal edirdi. Yeni mühərrik 1965-ci ildə müharibədən sonrakı ilk Audi modelində debüt etmişdir.
Məlum olduğu kimi, 1964-cü ildə Daimler Auto Union şirkətindəki payını Volkswagen şirkətinə satıb. Yeri gəlmişkən, Mercedes şirkətinin hazırladığı yeni modellər ilə yaxından tanış olan Kraus Auto Union şirkətinin texniki direktoru olub. Bu səbəbdən də Daimler “ilk Audi 100 modelinin korpusunun W119 modelinin funksiyalarına malik olduğunu” bildirmişdi. Bəli, dünyanın belə qəribə işləri var…
