Dünyanın ən qədim, dadlı və zəngin mətbəxlərindən biri Azərbaycan mətbəxidir. Azərbaycan mətbəxinə aid olan ətli xörəklər müxtəlifliyinə görə rəngarəngdir. Ət xörəklərinin ən qədim və dadlı yeməklərindən biri də öz suyunda, tərəvəzlərlə bişən xaşlama yeməyidir. Beləliklə, “Gencaile.az” saytının “Yeməyə nə var?” rubrikasında sizə dadlı xaşlama reseptini təqdim edirik.
Tərkibi:
1 kq sümüklü ət (qoyun,quzu və ya mal)
5 ədədsoğan
7 ədəd kartof
3-4 ədəd bolqar bibəri
2-3 ədəd pomidor
2 ədəd dəfnə yarpağı
1 çimdik qırmızı acı bibər tozu
duz, istiot
Hazırlanma qaydası:
İlk öncə ətı doğrayıb yuyun. Yuyulub suyu süzülmüş ətləri qazana yığın. Üzərinə 3 stəkan qaynar su töküb ocağa qoyun. Bişdikdə üzərinə yığılan kəfi götürüb dəfnə yarpağı atın və ət yumşalana qədər bişirin. Bolqar bibərini doğrayın, kartofların qabığını soyub dilimləyin. Pomidoru da dilimləyin, soğanları da halqa formasında kəsin. Bişmiş ətlərin üzərinə doğranmış bolqar bibəri, kartof, pomidoru və soğanları əlavə edin. Duz, istiot, acı bibər tozu səpib qarışdırın. Qazanın qapağını örtüb kartoflar bişənədək vam odda bişirin. Yeməyin üzərinə doğranmış göyərti səpib süfrəyə verin.
Təqdim etdi: İlahə Atəş
