Yay aylarında uşaqlar daha çox açıq havada vaxt keçirir və bu da onları ağcaqanad sancmaları ilə daha tez-tez qarşılaşdırır. Əksər hallarda ağcaqanad sancması sadəcə qaşınma və yüngül qızartı ilə müşayiət olunur və bir neçə gün ərzində öz-özünə keçir. Lakin bəzi hallarda bu sancmalar ciddi reaksiyalara və ya infeksiyalara səbəb ola bilər. Valideynlər hansı əlamətlərin normal, hansılarının isə təhlükəli olduğunu bilməlidirlər.

Ağcaqanad sancdıqdan sonra dəridə kiçik, qızarmış və qaşınan şişkinlik əmələ gəlməsi normal hesab olunur. Xüsusilə azyaşlı uşaqlarda bu şişkinlik böyüklərlə müqayisədə daha iri görünə bilər. Bunun səbəbi uşaqların immun sisteminin ağcaqanadın tüpürcəyində olan maddələrə daha güclü reaksiya verməsidir.

Hansı hallarda narahat olmağa ehtiyac yoxdur?

Əgər sancılan nahiyədə:

yüngül qızartı varsa;

qaşınma müşahidə olunursa;

kiçik şişkinlik əmələ gəlibsə;

uşağın ümumi vəziyyəti yaxşıdırsa,

adətən xüsusi müalicəyə ehtiyac olmur. Nahiyəni təmiz saxlamaq, soyuq kompres tətbiq etmək və uşağın həmin yeri qaşımasının qarşısını almaq kifayətdir. Çünki davamlı qaşımaq dəriyə mikrob düşməsinə və infeksiyanın inkişafına səbəb ola bilər.

Ağcaqanad sancması nə vaxt təhlükəli hesab edilir?

Valideynlər aşağıdakı hallarda mütləq həkimə müraciət etməlidirlər:

Nəfəs almaqda çətinlik yaranarsa. Bu, çox nadir rast gəlinsə də, ağır allergik reaksiyanın əlaməti ola bilər və təcili tibbi yardım tələb edir.

Üz, dodaq, göz qapaqları və ya boğaz nahiyəsində sürətlə artan şişkinlik olarsa.

Sancılan nahiyə getdikcə daha çox qızarır, isti olur, ağrıyır və irin gəlirsə. Bu, bakterial infeksiyanın inkişaf etdiyini göstərə bilər.

Uşaqda yüksək hərarət, halsızlıq, səpkilər və ya ümumi vəziyyətin pisləşməsi müşahidə olunarsa.

Qızartı bir neçə santimetrdən böyük sahəyə yayılırsa və hər gün böyüməyə davam edirsə. Bəzi uşaqlarda ağcaqanad sancmasına qarşı daha güclü allergik reaksiya inkişaf edə bilər.

Ağcaqanad sancması hansı xəstəlikləri ötürə bilər?

Ölkəmizdə adi ağcaqanad sancmaları əksər hallarda ciddi infeksiyalarla nəticələnmir. Lakin dünyanın bəzi bölgələrində ağcaqanadlar denge, malyariya, Zika virusu və digər infeksiyaları ötürə bilir. Buna görə də xarici ölkələrə səyahət edən ailələr getdikləri bölgənin epidemioloji vəziyyəti barədə əvvəlcədən məlumatlanmalı və qoruyucu tədbirlərə əməl etməlidirlər.

Uşaqları ağcaqanad sancmalarından necə qoruya bilərik?

Ən effektiv qorunma üsulu sancmanın qarşısını almaqdır. Bunun üçün:

axşam saatlarında uşağın uzunqol və açıq rəngli geyimlər geyinməsi məqsədəuyğundur;

pəncərələrdə torlardan istifadə edilməlidir;

otaqda ağcaqanadların çoxalmasına şərait yaradan durğun su mənbələri aradan qaldırılmalıdır;

uşağın yaşına uyğun həşəratqovan vasitələr yalnız təlimata uyğun şəkildə istifadə olunmalıdır;

körpə arabaları və çarpayılar üçün qoruyucu torlardan istifadə etmək faydalıdır.

Valideynlər üçün vacib məqam

Ağcaqanad sancmalarının böyük əksəriyyəti təhlükəli deyil və ev şəraitində nəzarət altında sağalır. Lakin uşaqda nəfəs darlığı, sürətlə yayılan şişkinlik, yüksək hərarət və ya infeksiya əlamətləri yaranarsa, vaxt itirmədən həkimə müraciət etmək lazımdır. Erkən qiymətləndirmə həm ağırlaşmaların qarşısını alır, həm də uşağın daha qısa müddətdə sağalmasına kömək edir.

Pediatr Səma Fərəcova