Avropaya səyahət etmək istəyənlər üçün əsas məsələlərdən biri yalnız gediləcək ölkəni seçmək deyil, həm də səfərin ümumi xərcini əvvəlcədən hesablamaqdır. Otel, restoran, gündəlik alış-veriş və digər xidmətlərin qiymətləri ölkədən ölkəyə ciddi şəkildə dəyişə bilir.
Aparılan müqayisə Avropada daha münasib qiymətlərlə istirahət etməyin mümkün olduğu istiqamətləri ortaya qoyub.
Araşdırmada ölkələr üzrə istehlak qiymətləri, eləcə də turistlərin ən çox qarşılaşdığı xidmətlərin dəyəri müqayisə edilib. Bununla belə, nəzərə almaq lazımdır ki, göstərilən rəqəmlər ölkə üzrə orta göstəricilərdir. Məşhur kurortlarda və böyük şəhərlərdə qiymətlər daha yüksək ola bilər.
Ən aşağı ümumi qiymətlər hansı ölkədədir?
Araşdırmanın nəticələrinə əsasən, ümumi qiymət səviyyəsinə görə Türkiyə Avropanın ən sərfəli istiqamətlərindən biri kimi önə çıxır.
Avropa İttifaqında istehlak səbətinin orta qiyməti 100 avro səviyyəsində olduğu halda, Türkiyədə bu göstərici təxminən 59,6 avro təşkil edir. Bu isə gündəlik xərclər baxımından Türkiyənin büdcəsinə qənaət etmək istəyən turistlər üçün daha münasib seçimlərdən biri olduğunu göstərir.
Əks istiqamətdə isə Fransa dayanır. Araşdırmada ölkə Avropada ən yüksək ümumi qiymət səviyyəsinə malik istiqamət kimi göstərilib.
Otel və restoran xərclərinə görə hansı ölkə daha sərfəlidir?
Səyahət büdcəsində ən böyük paylardan birini yaşayış və qidalanma xərcləri tutur. Bu baxımdan ölkələr arasında fərq daha da nəzərəçarpan olur.
Otel və restoran xidmətlərinin qiyməti üzrə ən bahalı ölkə Fransa olub. Daha qənaətli istirahət planlaşdıranlar üçün isə Portuqaliya diqqət çəkir. Burada otel və restoran qiymətləri Avropa İttifaqının orta göstəricisindən təxminən 26,4 faiz aşağıdır.
Bu göstərici xüsusilə restoranlarda yemək və hotel xərclərini əvvəlcədən hesablayan turistlər üçün əhəmiyyətlidir.
Alkoqollu içkilərdə maraqlı mənzərə
Qiymət müqayisəsinin daha bir maraqlı nəticəsi alkoqollu içkilərlə bağlıdır.
Ümumi istehlak xərclərinin aşağı olması Türkiyədə bütün məhsul və xidmətlərin ucuz olduğu anlamına gəlmir. Əksinə, araşdırmada Türkiyədə alkoqollu içkilərin qiymətinin müqayisə edilən ölkələr arasında ən yüksək olduğu göstərilir.
Bu kateqoriyada isə ən sərfəli ölkə İtaliya olub.
Ucuz səyahət üçün yalnız ölkə seçimi kifayət etmir
Səfərin büdcəsini müəyyən edən əsas amillərdən biri ölkənin ümumi qiymət səviyyəsi olsa da, real xərclər turistin seçdiyi şəhər və səyahət tarixindən də ciddi şəkildə asılıdır.
Eyni ölkədə paytaxt və məşhur turizm mərkəzlərində qiymətlər daha yüksək, kiçik şəhərlərdə isə nisbətən aşağı ola bilər. Bundan başqa, yay mövsümü, bayram günləri və turist axınının artdığı dövrlərdə otel və nəqliyyat xərcləri də yüksələ bilər.
Buna görə büdcəli səyahət planlaşdıranlar otel qiymətlərini əvvəlcədən müqayisə etməli, aviabilet və digər nəqliyyat xərclərini nəzərə almalı, gündəlik qidalanma və əyləncə üçün ayrıca büdcə müəyyənləşdirməlidirlər.
Beləliklə, yalnız “ən ucuz ölkə” axtarmaq əvəzinə, səfərin bütün xərclərini birlikdə hesablamaq daha sərfəli seçim etməyə imkan verir.
