2010-cu ildə Azərbaycan Respublikası Təhsil Nazirliyi, OMBUDSMAN İnsan Hüquqları üzrə Müvəkkili, Uşaq Hüquqları üzrə QHT Alyansı və “Ümidli Gələcək” Gənclər Təşkilatı, Azercell Telecom Şirkətinin dəstəyi ilə, UNİCEF, “Uşaqların Xilası”, “Dünyaya Baxış”, beynəlxalq təşkilatları ilə birlikdə “Azərbaycan Uşaq Qaynar Xətt” xidmətini təsis etmişlər.

Xüsusilə qeyd etmək lazımdır ki, “Azərbaycan Uşaq Qaynar Xətt” xidməti Niderlandın paytaxtı Amsterdamda yerləşən və 100-dən çox uşaq qaynar xətlərini özündə birləşdirən Beynəlxalq Uşaq Qaynar Xəttlər təşkilatının tam hüquqlu üzvüdür.

Fəaliyyət göstərdiyi 5 il ərzində “Azərbaycan Uşaq Qaynar Xətt” xidmətinə müxtəlif problemləri əhatə edən 11.500-dən çox zəng daxil olmuşdur. Abonentlərin müraciətləri müxtəlif sahələri əhatə edən problemlərin həlli ilə bağlı olmuşdur.

Bununla belə, hələ də Azərbaycanın bölgələrində emosional-psixoloji, eləcə də mənəvi və hüquqi yardıma ehtiyacı olan, lakin hara müraciət etmək barədə məlumatı olmayan minlərlə uşaq və gənclər var. Həmin uşaqlara və onların valideynlərinə dəstək olmaq, onlara lazımi məsləhət vermək və müxtəlif icma əsaslı xidmətlərə yönəltmək üçün təşkilatımız tərəfindən 2014-cü ilin 19 dekabr tarixində Gəncə Şəhər İcra Hakimiyyəti, Azərbaycan Respublikası Təhsil Nazirliyi, Boeing, Avirtel MMC ilə birgə əməkdaşlıqla və Azercell MMC-nin maliyyə dəstəyi ilə Gəncə şəhərində “Gəncə Regional Uşaq Qaynar Xətt” xidməti yaradılmışdır.

“Uşaq Qaynar Xətt”i uşaqlar üçün yardım xidməti kimi yarandığı üçün zənglər pulsuzdur. Şəhərlərarası danışıqların ödənişli olamsını nəzərə alaraq, 2012-ci ilin fevral ayından “Azərbaycan Uşaq Qaynar Xətt” xidməti, 2014-ci ilin dekabr ayından etibarən isə “Gəncə Regioanl Uşaq Qaynar Xətt” xidməti Avirtel MMC-nin dəstəyi ilə toll-free nömrə (“Azərbaycan Uşaq Qaynar Xətt”xidməti: 088-480-22-80;  “Gəncə Reional Uşaq Qaynar Xətt”xidməti:088-256-20-40) ilə təmin olunmuşdur. Bu nömrəyə zəng edərkən siz tərəfdən heç bir xidmət haqqı ödənilməyəcəkdir.

“Azərbaycan Uşaq Qaynar Xətt”xidmətinin əlaqə nömrələri (012) 480 22 80; (051) 880 11 80 və (050) 680 22 80; (088) 480 22 80 –dir.

“Gəncə Regional Uşaq Qaynar Xətt”xidmətinin əlaqə nömrələri (022) 256 20 40; (051) 880 22 80; (051) 580 22 80; və (088) 256 20 40-dır.

“Uşaq Qaynar Xətt” xidmətinin şəhərdaxili nömrəsinə şəhəraxili telefonlardan edilən zənglər, həmçinin toll-free nömrəsinə rayonlardan edilən zənglər pulsuzdur. Şəhərdaxili nömrə və toll-free nömrəsinə həftə içi 5 gün saat 09:00-dan – 18:00- a kimi zəng edə bilərsiniz. Mobil nömrələrə isə günün istənilən vaxtı xidmətinizdədir. Ola bilsin ki, bəzən xətt məşğul olsun. Xahiş edirik ki, bir daha zəng vurmağa cəhd edəsiniz və biz sizə mütləq cavab verəcəyik!

“Uşaq Qaynar Xətt” xidmətinin işçi heyyəti uşaqlarla iş sahəsində geniş təcrübəyə malik olan psixoloqlar, hüquqşünaslar  və sosial işçilərdən ibarətdir.

“Uşaq Qaynar Xətt” xidmətində ən vacib prinsiplərdən biri məxfilikdir. Siz bizə zəng edərkən özünüz barəsində heç bir şəxsi məlumat verməyə bilərsiniz. Sizin telefon nömrələriniz qeyd olunmur və söhbətin audio yazılışı aparılmır. Yalnız uşağın və valideynin icazəsi olduqda problemin həlli bunu tələb edirsə müraciət digər müvafiq təşkilatlara çatdırıla bilər.

Siz istədiyiniz vaxt yardim@usaqxetti.az elektron ünvanına, http://www.facebook.com/ AzerbaijanChildHelpline ünvanına məktub, mobil telefonuna SMS göndərə bilərsiniz. Bizim məsləhətçilər sizin suallarınızı mütləq cavablandıracaqlar. “Uşaq Qaynar Xətt” xidməti barəsində ətraflı məlumatı www.usaqxetti.az  internet səhifəsindən əldə edə bilərsiniz.