2026-cı ilin yay mövsümü yaxınlaşdıqca səyahət planları da aktuallaşır. İnflyasiyanın artdığı və bir çox insanın gündəlik xərclərini azaltmağa məcbur qaldığı bir dövrdə, varlı təqaüdçülər isə maddi imkanlarından istifadə edərək xaricə lüks səfərlər planlaşdırmağa davam edirlər.

Mütəxəssislərin sözlərinə görə, bu kateqoriyadan olan səyahətçilər üçün əsas prioritet rahatlıq, fərdi xidmət və daha az yorucu marşrutlardır.

Səyahət ekspertlərinin fikrincə, 2026-cı ilin yayında varlı təqaüdçülərin ən çox üstünlük verdiyi istiqamətlər bunlardır:

Aralıq dənizi – gəmi ilə səyahət

İmkanlı təqaüdçülərin bir qismi hava limanlarının yoruculuğundan imtina edərək dəniz səyahətlərinə üstünlük verir. Xüsusilə Aralıq dənizi bu baxımdan ən populyar istiqamətlərdən biridir.

Ekspertlər bildirir ki, bu region həm yaxın məsafədə yerləşən müxtəlif ölkələri rahat şəkildə kəşf etməyə imkan verir, həm də səyahəti daha az yorucu edir. Bu səbəbdən Aralıq dənizi “arzu edilən səyahət”i rahat şəkildə reallaşdırmaq üçün ideal seçim sayılır.

İtaliya – Sardiniyanın Costa Smeralda bölgəsi

Aralıq dənizi daxilində xüsusi diqqət çəkən məkanlardan biri də Sardiniyada yerləşən Costa Smeralda bölgəsidir. Kristal təmiz, firuzəyi suları və eksklüziv limanları ilə tanınan bu ərazi lüks səyahətçilərin əsas seçimlərindəndir.

Mütəxəssislər qeyd edir ki, burada əsasən yüksək səviyyəli otellər fəaliyyət göstərir və bu da qonaqlara məxfilik, yüksək xidmət və dəniz mənzərəsi təqdim edir. Bundan əlavə, Amalfi sahilləri ilə müqayisədə daha sakit mühit yaşlı səyahətçilər üçün daha uyğun hesab olunur.

Yaponiya

Son dövrlərdə varlı təqaüdçülər arasında Yaponiyaya maraq da əhəmiyyətli dərəcədə artıb. Bu ölkə zəngin mədəniyyəti, sakit atmosferi və yüksək xidmət keyfiyyəti ilə seçilir.

Ekspertlər bildirir ki, burada səyahət proqramları adətən balanslı şəkildə qurulur – fərdi bələdçilər, rahat nəqliyyat və yüklənməyən marşrutlar sayəsində səfər həm maraqlı, həm də yorucu olmayan təcrübəyə çevrilir.

Karib hövzəsi

Karib regionu uzun illərdir varlı turistlərin sevimli istirahət məkanlarından biri olaraq qalır və 2026-cı ildə də populyarlığını qoruyur. Lakin bu dəfə tendensiya bir qədər dəyişib.

Artıq böyük kurort komplekslərindən daha çox fərdi villalara və ya yaxta tipli səyahətlərə üstünlük verilir. Bu yanaşma daha çox məkan azadlığı, rahatlıq və kommersiya hissindən uzaq istirahət imkanı yaradır.

Keniya və Tanzaniya – safari təcrübəsi

Macəra axtaran varlı təqaüdçülər üçün Afrika istiqaməti də diqqət mərkəzindədir. Xüsusilə Keniya və Tanzaniya safari turları ilə seçilir.

Ekspertlərin sözlərinə görə, safari səyahətləri həm baha, həm də uzunmüddətli olur. Məhz buna görə də belə səfərlər əsasən təqaüddən sonra mümkün olur. Son dövrlərdə bir neçə ölkəni əhatə edən və ya “safari + dəniz” formatında təşkil olunan uzun səyahətlərə maraq artıb.

Tənzilə Ağabalayeva