Kişilərdə cinsi istəksizlik və cinsi zəiflik yalnız kişinin öz sağlamlığı ilə bağlı məsələ deyil. Bu problem evli cütlüklərin münasibətlərinə, qadının cinsi məmnunluğuna, emosional vəziyyətinə və hətta tərəflər arasında qarşılıqlı münasibətə ciddi təsir göstərə bilər. Bəzən cütlüklər problemin kökünü düzgün müəyyənləşdirmədiyi üçün zaman keçdikcə cinsi məsələ münasibətlərdə inciklik, küskünlük və uzaqlaşma yaradan əsas səbəblərdən birinə çevrilir.

Ginekoloq kimi müraciətlər zamanı qadınların bir qisminin məhz həyat yoldaşının cinsi istəyinin azalmasından və ya cinsi əlaqənin tam baş tutmamasından narahat olduğunu müşahidə edirik. Bu vəziyyət qadında “artıq məni istəmir”, “məndə problem var”, “başqa qadınla münasibəti ola bilər” kimi düşüncələrin yaranmasına səbəb ola bilər. Halbuki problemin səbəbi heç də həmişə münasibətlə və ya qadının görünüşü ilə əlaqəli olmur.

Kişilərdə cinsi istəksizlik və zəifliyin səbəbləri nələrdir?

Kişidə cinsi istəyin azalması və ereksiyanın zəifləməsi müxtəlif səbəblərlə bağlı ola bilər. Uzunmüddətli stress, yuxusuzluq, iş və maddi problemlər, depressiv əhval, münasibətlərdə gərginlik, həddindən artıq yorğunluq və bəzi dərmanların istifadəsi cinsi funksiyaya təsir göstərə bilər.

Bununla yanaşı, hormonal və digər tibbi səbəblər də nəzərə alınmalıdır. Testosteron səviyyəsinin aşağı olması, şəkərli diabet, artıq çəki, yüksək arterial təzyiq, damar problemləri, qalxanabənzər vəzin bəzi xəstəlikləri və digər sağlamlıq problemləri kişidə cinsi istəyin və ereksiyanın azalmasına səbəb ola bilər.

Ona görə də cinsi zəifliyi yalnız “psixoloji məsələdir” deyərək qiymətləndirmək düzgün deyil. Xüsusilə problem davamlı xarakter daşıyırsa, kişi müvafiq həkim müayinəsindən keçməlidir.

Bu vəziyyət qadının cinsi həyatına necə təsir edir?

Cinsi münasibət yalnız fiziki yaxınlıq deyil, həm də ər-arvad arasında emosional bağın formalaşmasında mühüm rol oynayır. Kişidə cinsi istəksizlik və ya ereksiya problemi olduqda qadının cinsi ehtiyacları da uzun müddət qarşılanmaya bilər.

Bəzi qadınlar bu vəziyyətdə özlərini arzuolunmaz hiss etməyə başlayırlar. Xüsusilə əvvəllər normal cinsi həyatı olan cütlükdə sonradan belə dəyişiklik yaranıbsa, qadın bunun səbəbini özündə axtara bilər.

“Artıq məni bəyənmir?”, “Mənim görünüşümdə problem var?”, “Niyə mənə qarşı əvvəlki kimi istək göstərmir?” kimi suallar qadında özünəinamın azalmasına gətirib çıxara bilər.

Əslində isə kişinin cinsi funksiyasındakı problem çox vaxt qadının cazibədarlığı ilə əlaqəli olmur.

Cütlüklər arasında hansı problemlər yarana bilər?

Belə vəziyyət uzun müddət müzakirə edilmədikdə tərəflər arasında emosional məsafə yarana bilər. Qadın özünü rədd edilmiş hiss edir, kişi isə öz problemini etiraf etməkdən utanır və bundan qaçmağa çalışır.

Nəticədə cinsi münasibətdən yayınma, toxunuşların azalması, bir-birinə qarşı soyuqluq, tez-tez mübahisələr və qarşılıqlı ittihamlar yarana bilər.

Ən təhlükəli məqamlardan biri də problemin açıq şəkildə danışılmamasıdır. Kişi uğursuzluq yaşayacağından qorxduğu üçün cinsi yaxınlıqdan qaçır, qadın isə bunu “mənə qarşı istəyi yoxdur” kimi qəbul edir. Beləliklə, hər iki tərəf öz daxilində fərqli nəticəyə gəlir və problem daha da dərinləşir.

Qadının cinsi ehtiyacları da nəzərə alınmalıdır

Ailə münasibətlərində cinsi həyatın yalnız kişinin ehtiyacları üzərindən qiymətləndirilməsi düzgün deyil. Qadının da cinsi istəyi, yaxınlıq ehtiyacı və məmnuniyyəti vardır.

Kişidə davamlı cinsi problem olduğu halda qadının öz ehtiyaclarını ifadə etməsi bəzən “təzyiq göstərmək” kimi qəbul edilə bilər. Halbuki məsələ qarşı tərəfi günahlandırmaq deyil, problemin birlikdə həll edilməsidir.

Qadının uzun müddət cinsi məmnuniyyətsizlik yaşaması da münasibətlərə mənfi təsir göstərə bilər. Bu səbəbdən cütlüklər problemin mövcudluğunu qəbul etməli və bir-birlərinin ehtiyaclarına hörmətlə yanaşmalıdırlar.

Kişi bu problemi gizlətməməlidir

Cinsi zəiflik kişilər arasında hələ də utanılacaq və gizlədiləcək məsələ kimi qəbul edilə bilir. Bu səbəbdən bəzi kişilər illərlə həkimə müraciət etmir, müxtəlif vasitələri özbaşına qəbul edir və problemin daha da uzanmasına səbəb olurlar.

Əslində ereksiya problemi və cinsi istəyin azalması bəzən orqanizmdə başqa bir problemin göstəricisi də ola bilər. Buna görə də davamlı şikayətlər zamanı uroloq-androloq və ya uyğun digər mütəxəssis tərəfindən qiymətləndirmə aparılması vacibdir.

Qadın isə həyat yoldaşını utandırmaq və ya müqayisə etmək əvəzinə, problemin sağlamlıq məsələsi ola biləcəyini nəzərə almalıdır.

Cütlük nə etməlidir?

Əvvəla, tərəflər bir-birini günahlandırmamalıdır. “Sən məni istəmirsən” və ya “səndə problem var” kimi ifadələr vəziyyəti daha da gərginləşdirə bilər.

Daha doğru yanaşma problemin sakit şəkildə müzakirə olunmasıdır. Kişi özündə dəyişiklik hiss edirsə, bunun səbəbini araşdırmalıdır. Qadın da bu prosesdə həyat yoldaşını emosional olaraq dəstəkləyə bilər.

Problemin səbəbindən asılı olaraq hormonal müayinələr, ümumi sağlamlıq göstəricilərinin qiymətləndirilməsi, qəbul edilən dərmanların nəzərdən keçirilməsi və psixoloji faktorların araşdırılması lazım gələ bilər. Bəzi hallarda cütlük terapiyası və ya seksoloq dəstəyi də faydalı olur.

Ən əsası isə cinsi problemlər ailə daxilində susaraq həll olunmur. Problemi gizlətmək, tərəf müqabilini günahlandırmaq və ya özbaşına dərman qəbul etmək əvəzinə, səbəbi müəyyənləşdirmək lazımdır.

Cinsi həyatdakı problem çox vaxt münasibətin sonu demək deyil. Əksinə, səbəb vaxtında müəyyənləşdirildikdə və hər iki tərəf problemin həllinə birlikdə yanaşdıqda həm cinsi həyatın, həm də ailə münasibətlərinin yaxşılaşması mümkündür.

Mama-ginekoloq Aygün Musayeva