Başlıqdakı bu sözlərlə demək olar ki, bütün gəlin və qayınanalar bir-birilərinə müraciət edirlər. Ancaq bunu səmimiyyətlə ifadə edən nə qədər gəlin və ya qayınana var? Elə isə gəlinlər və qayınanalar bir-biriləri ilə necə davranmalıdırlar? Gəlin bu sualın cavabını bir yerdə axtarmağa çalışaq…
Gəlinlər necə davranmalıdırlar?
* Qayınananızı ananızdan ayırmayın. Ananızla mübahisə etdikdən sonra onun könlünü necə alırsınızsa, qayınananızın da könlünü elə alın.
* Onun pis hərəkətlərini görməməzliyə vurun, yaxşı hərəkətlərini isə hamıya danışın.
* Qayınananıza sevginizi ifadə etməkdən çəkinməyin.
* Özünüzün də bir gün qayınana olacağınızı unutmayın.
* Aradakı nəsil fərqini nəzərə alaraq anlaşılmazlıqları səmimi qarşılamağa çalışın.
* Bayramlarda, əlamətdar günlərdä qayınananızı ziyarət edin, əgər bu mümkün deyilsə, zəng edin.
* Həyat yoldaşınızın ata-anasını tez-tez görməsindən narahat olmayın. Unutmayın ki, siz də ananızı o qədər sevirsiniz.
Qayınanalar necə davranmalıdırlar?
* Gəlininizi qızınızdan ayırmayın. Özünüzün də bir vaxtlar gəlin olduğunuzu və yaşadığınız problemləri xatırlayın.
* Gəlininizə sevginizi ifadə etməkdən çəkinməyin.
* Gəlininizə səhvlərini, çatışmazlıqlarını qəlbinə dəymədən söyləməyə çalışın, yaxşı hərəkətlərini isə hamıya danışın.
* Gəlininizin gördüyü hər işə müdaxilə etməyin, bəzən sizin istədiklərinizi etməsə belə, bunu səmimi qarşılamağa çalışın.
* Gəlininizin qohumları ilə görüşməsindən narahat olmayın. Sizi tez-tez görməyə gələn qızınızı xatırlayın.
* Siz gəlininizlə nə qədər xoş davransanız, oğlunuzun da yuvası bir o qədər möhkəm olar.
* Bəzən gəlininizin də öz uşaqlarınız kimi şıltaqlıq edə biləcəyini unutmayın.
Aydan Kərimli
