maska

Maskalara nə vaxt əlvida deyəcəyik?

Baxış sayı: 797

Səhiyyə Nazirliyinin mütəxəssis-eksperti, infeksionist Təyyar Eyvazov hazırda Azərbaycanda epidemioloji vəziyyətin qənaətbəxş olduğunu deyib. 

“Gencaile.az” saytı “Publika.az”-a istinadən xəbər verir ki, baş infeksionistin sözlərinə görə, ölkədə “omikron” ştamına qarşı kütləvi immunitet hələ yaranmayıb.

– Doktor, hazırda epidemioloji vəziyyəti necə qiymətləndirirsiniz? Ümumiyyətlə, Azərbaycan səhiyyəsi “omikron” ştamının öhdəsindən necə gəldi və ya gəlir? 

– Hazırda epidemioloji durum qənaətbəxşdir, son günlər pozitiv dinamika izlənilir. Yəni, yoluxma hallarının sayında, əhalinin test olunmaq üçün müraciətlərində azalma qeyd olunur, sağalan xəstələrin sayı yeni yoluxanları üstələyir, yəni biz hazırda dalğanın enişindəyik. Görülmüş kompleks tədbirlər nəticəsində “omikron” ştamının yayılma sürəti səngiyib, ambulator müəssisələrin iş yükü artsa da, stasionarların izafi yüklənməsi baş verməyib. Kritik xəstələrin sayı və ölüm göstəricisi əvvəlki dalğalarla müqayisədə aşağıdır.

– Bir çox mütəxəssis ölkədə artıq kütləvi immunitetin formalaşdığını qeyd edir. Bu halda maska qadağasının aradan qaldırılması mümkündürmü? 

– Mütəxəssislər hesab edirlər ki, “omikron” ştamının hegemonluğu dövründə populyasion immunitetin əldə olunması üçün əhalinin 80 faizdən çox hissəsində peyvənd və ya təbii yolla qoruyuculuğun formalaşması tələb olunur. Ölkəmizdə hələ ki, bu hədəflərə çatmamışıq. Ona görə də maska qadağasının qapalı məkanlarda aradan qaldırılması qərarının zamana ehtiyacı var.

– Vaksinasiya prosesinin nə zamana qədər davam etdiriləcəyi gözlənilir?

– Çox güman ki, pandemiya davam etdikcə vaksinasiya aktual olaraq qalacaq. Pandemiya bitdikdən sonra isə mövsümlə əlaqədar peyvəndləmənin tövsiyə olunması düşünülür.




Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir