Bu yaxınlarda rejissor Vahid Mustafayevin “Qanlı yanvar” filminin çəkilişləri üçün Bakıda olan türkiyəli aktrisa Nəbahət Çəhrə ekran işi və şəxsi həyatı haqda maraqlı açıqlamalar verib.
ANS televiziyasında qonaq olan aktrisa filmin ssenarisini çox bəyəndiyini deyib: “Bu mövzularda çox həssasam. Ssenarini böyük bir zövqlə qəbul etdim. Çəkilişlər çox gözəl gedir. Burada ana obrazını canlandırıram. Bu, indiyədək oynadığım digər rollardan çox fərqlənir: təbii, makiyajsız bir qadın, iki övladının xoşbəxt olması üçün çalışan, ailə ocağını qorumaq üçün mübarizə aparan, nəvələrini görməyə çalışan bir ana”.
N.Çəhrə özünün indiyədək istəyərək ana olmadığını və bunun səbəbini açıqlayıb: “Özüm istəmədim. Səbəbi karyera deyildi. Mən balaca olanda atam rəhmətə getdi. 5 yaşımda Samsundan İstanbula köçdük. Anamın ikinci dəfə ailə qurduğu şəxs hakim idi. Onu bir o qədər də sevə bilmədim. Bu düşüncə beynimdə qaldı və ögey atamı sevmədiyim üçün ana olmaq istəmədim. Uşaq ana-atası ilə xoşbəxt böyüməlidir”. (axşam.az)
