Zaman keçdikcə “qadın və kişi bərabərliyi” anlayışı bir çox cəmiyyətlərdə müxtəlif şəkildə başa düşülməyə başladı. Bəziləri bunu rəqabət kimi gördü – sanki qadın və kişi bir-biri ilə yarışmalıdır. Bəziləri isə bu anlayışı yanlış başa düşərək, qadının kişi kimi davranmasını və ya kişinin qadınlaşmasını bərabərlik saydı. Əslində isə qadın-kişi bərabərliyi eyniləşmək deyil, fərqli cəhətləri ilə bir-birini tamamlamaq və hörmət etməkdir.

Qadın və kişi psixoloji olaraq fərqli psixikaya malikdirlər. Əslində bu, problem deyil, bu instinktdir.

Qadın və kişi beyni fərqli struktura malikdir. Bu, bioloji və hormonal səviyyədə olan fərqlərlə əlaqəlidir və onların emosional reaksiyalarını, ünsiyyət tərzlərini, təhlükəyə yanaşmalarını və problemləri həll etmə üsullarını fərqləndirir.

Qadın psixologiyası empatiya, əlaqə və emosional istiqamətdən daha güclüdür. O, bioloji olaraq çoxaldan, psixoloji olaraq idarə edəndir.

Qadın duyğulara əsaslanaraq qərar verir, emosional dərinliyi ilə ailədə birliyi qoruyur. O, eyni anda bir neçə hissi və işi idarə edə bilir.

Kişi psixologiyası isə daha çox məntiq, istiqamət və nəticə yönümlüdür. Kişilər problem həll etməyə fokuslanır, konkretlik və məqsədə çatmaq onlar üçün çox önəmlidir. Onlar hissləri birbaşa deyil, davranışla ifadə etməyə meyllidirlər.

Bu fərqliliklərdən dolayı, qadınlar daha çox “eşidilmək”, kişilər isə “hörmət olunmaq” ehtiyacı hiss edirlər. Bu isə onların psixoloji güvənlik sisteminin təməl hissəsidir.

Bərabərlik nədir, nə deyil?

Bərabərlik eyni olmaq demək deyil.

Bərabərlik – eyni dərəcədə dəyərli olmaq, hüquqlarda və fürsətlərdə balanslı davranmaq deməkdir.

Qadınla kişi funksional olaraq fərqli, insan olaraq isə eyni dəyərə malikdirlər.

Bu fərqi anlamadan qurulan münasibətlərdə biri ya digərini əzməyə, ya da özünü gücsüz hiss etməyə başlayır.

Qadının gücü zərifliyindədir, kişinin gücü qoruyuculuğundadır

Cəmiyyətdə bəzən qadının yumşaqlığı zəiflik kimi göstərilir. Əslində isə qadının zərif enerjisi – sevgi, şəfqət və anlayışla onun daxili gücüdür.

Bu güc – həm yüksək səviyyəli güc, həm də zəriflikdir.

Kişi isə bu sistemdə müdafiəçi, dayaq və yolgöstərən rolu ilə qadına təhlükəsizlik hissi verir. Onun gücü səs qaldırmaqda deyil, varlığı ilə sabitlik yaratmaqda özünü göstərir.

Vəzifələrimiz nədir?

Qadın:

Özünü tanımalı, dəyərini bilməlidir,

Zərifliyini qoruyaraq içindəki gücü ifadə etməlidir,

Qorunmağa ehtiyac duyduğuna görə yox, dəyərli olduğuna görə sevilməlidir.

Kişi:

Gücünü qadına hökm etmək üçün yox, qorumaq və yön vermək üçün istifadə etməlidir,

Hisslərini susdurmamalı, emosional ifadəni zəiflik yox, cəsarət saymalıdır,

Qadının dəstəyini rəqabət yox, ortaq güc kimi görməlidir.

Nəticə: Bir-birimizə qarşı yox, bir-birimizlə yanaşı

Qadın və kişi bir-birini rəqib yox, rəfiq kimi gördükdə münasibətlərdə balans, hörmət və sevgi yaranır.

Qadınlar kişilərlə bərabər dəyərə sahibdirlər, lakin eyni deyillər. Bu fərqliliklər isə məhz həyatın rəngini, ahəngini yaradır.

Əsl bərabərlik – rəğbət və məsuliyyət paylaşımıdır.

Kişi gücünə görə baş tacıdırsa, qadın da duyğularına görə evin qəlbidir.

Bir-birini tamlayan iki varlıq – eyni göydəki günəş və ay kimi.

Psixoloq Nuridə Cavadova

(Psixoloq Nuridə Cavadova ilə 051 234 19 00 mobil nömrəsi vasitəsiylə əlaqə saxlaya bilərsiniz)