Hamilə qadınlar üçün Wi-Fi qurğusu Çində geniş müzakirələrə səbəb olub. BBC-nin xəbərinə görə, Çinin iki texnologiya şirkəti hamililər üçün nəzərdə tutulmuş, xüsusi parametrləri olan yeni simsiz qurğu uğrunda rəqabət aparır. “Qihoo 360” şirkətinin təqdim etdiyi qurğunun 3 parametri var: divara taxma, balans və hamilə qadınlar. Şirkətin iddiasına görə, 3-cü parametr qurğudan buraxılan radiasiyanı 70% azaldır.
“Xiaomi” şirkəti isə rəqibini marketinq taktikası işlətməkdə suçlayıb: “Onların iddia etdiyi hamiləlik rejimi, sadəcə, bir bazar taktikasıdır. Wi-Fi-dan istifadə təhlükəsizdir, rahat ola bilərsiniz”.
“Qihoo” şirkətinin baş katibi isə bildirib ki, şirkət radiasiyadan qorxanları hədəf alıb.
Qeyd edək ki, Wi-Fi kimi elektromaqnit dalğalarının insanların səhhətinə təsiri barədə müzakirələr davam edir. Lakin telekommunikasiya qurğularında istifadə olunan dalğaların sağlamlığa ciddi təsirinin olmadığı bildirilir.
Bununla belə, ABŞ-da yerləşən “BabySafe Wireless Project” təşkilatı xəbərdarlıq edir ki, simsiz radiasiya, həqiqətən, hamilə qadınlara və körpəyə təsir edir.
Ümumdünya Sağlamlıq Təşkilatı isə bu iddianı doğruldacaq sübutun olmadığını qeyd edir.
