lazer

2024-cü ilin gözəllik trendi necə olacaq?

Baxış sayı: 374

2024-cü ildə plastik cərrahlar daha orijinal, təmkinli estetika üçün həddindən artıq estetik prosedurlara qarşı xəbərdarlıq edərək, hüceyrə baxımı və sağlam yaşayışı vurğulamaqla təbii gözəlliyi qəbul etmək istiqamətində mədəni dəyişikliyi proqnozlaşdırırlar.

Moda dünyasında daim müəyyən tendensiyalar var və bu tendensiyalar pandemiya zamanı durğun fazaya daxil olsa da, sonradan öz sürətini bərpa etdi, hətta bir çox sektorlarda kifayət qədər iddialı tendensiyalar yarandı. Məsələn, daxili dizaynda, abadlıqda, dekorasiyada və hətta yeməkdə və təbii ki, gözəllikdə də.

Son 15-20 ildə qadınların hansı dəyişiklikləri yaşadıqlarını düşünün. 90-cı və 2000-ci illərdə anoreksiyadan əziyyət çəkən modellərin çılğınlığı ilə yanaşı, gənc qızlar həddindən artıq arıq qalmaq üçün müxtəlif yemək pozğunluqları ilə qarşılaşdılar.

Daha sonra, sağlam həyat tərzi, yoqa, idman və pilates, uyğun qidalanma tərzi ilə formalaşan sağlam və fit bədən ilə bir tendensiya ortaya çıxdı. Veqan və qlutensiz pəhrizlər populyarlıq qazandı və süd məhsulları bir kənara qoyuldu.

Daha sonradan isə bədən pozitivliyi tendensiyası ilə 90-cı illərdə doğulanlar fiziki görünüşünə daha az diqqət yetirməyə başladılar. Hətta mütənasib bədən forması artıq lazım hesab edilmirdi. İri omba və kalçalar, böyük sinə, həddindən artıq uzun dırnaqlar və saç uzatmaları birdən trendə çevrildi və təbii ki, bu tendensiya ilə sinə böyütmə əməliyyatları və omba böyütmə prosedurları tez-tez müzakirə olunmağa başladı. Kim Kardaşyan və ailəsi kimi bir qrup məşhur bu obrazın simvoluna çevrildi və bir çoxları onlara bənzəməyə çalışdı.

Dodaq və üz doldurucuları artdıqca, bütün dünyada qadınlar təbii görünüşdən uzaq bir görünüş əldə etmək üçün milyonlarla dollar xərclədilər. Lakin bütün bu tendensiyaların geridə qaldığı, təbiiliyin yenidən yüksəlişdə olduğu yeni dövr başlayıb. Sinə implantları və omba dolğuları artıq çıxarılır.

 

Realist görünüş

Yeni tendensiya təbii görünüşdən kənara çıxan bütün estetik tətbiqlərin və əməliyyatların köhnəlməsi ətrafında fırlanır. 2024-cü il tamamilə təbii görünməyə həsr olunacaq. Bəli, düz oxudunuz. Bir neçə həftə sonra qədəm qoyacağımız 2024-cü il bütün müxtəlif estetik tətbiqlərin və əməliyyatların sona çatdığı il olacaq.Artıq dərini yaxşılaşdırmaq, daha sağlam dəriyə sahib olmaq və təbii gözəlliyi qorumaq “dəbdə olacaq”.

Silikon implantlar, böyüdülmü sinə, omba dolğuları və şişirdilmiş “Mickey Mouse” dodaqları populyarlığını itirib.

“Biz təbii gözəllik anlayışını mübaliğəsiz izləmişik. Vaxt var idi ki, Kim Kardaşyanın ombası məşhur idi və qadınlar ombalarının üstünə yağ vurdururdular. Burunlar mümkün qədər qaldırılırdı. Estetik prosedurların kənardan baxdıqda bilinməsi arzu edilirdi. Məqsəd o idi ki, başqaları estetik işin görüldüyünü görsünlər”, -deyə türkiyəli estetik cərrah Dilek Avşar bildirir. O qeyd edir ki, həmin virtual görüntü artıq öz yerini təbii və real görünüşə verib.

Dolğuların azalması

Tendensiyanın istiqaməti və 2024-cü ildə bizi nələrin gözlədiyindən danışan estetik cərrah “bizdə olanları qoruyub saxlamaq və sahib olduqlarımızdan yaxşı istifadə etmək” deyə bildirib. O vurğulayıb ki, artıq estetikaya yanaşmamız da “təvazökar” olacaq. Üzdə və bədəndə çoxsaylı prosedurlardan qaçacağıq. “Lazım gələrsə, təbiiliyi pozmadan kifayət qədər miqdarda tətbiq seçmək olar. 2024-cü il təmizlənmə və hüceyrə baxımı ilidir, xüsusən də bu, ilin əsas trendi olacaq. Əsas məqsəd yaxşı yemək, su içmək, idman etmək və psixoloji rahatlığımızı qorumaqdır”.

“Yaş anlayışı getdikcə yox olur. İnsanlar indi düşünürlər ki, “65-dən sonra orta yaşlı olacağam. Ona görə də indi özümə yaxşı baxmalıyam”, -deyə həkim bildirib. Bu il hüceyrələrin nəyə ehtiyacı olduğunu araşdırmaq “dəbdə olacaq”. 2024-cü ilin estetik trendi ilə bağlı açıqlama verən Dilek Avşar deyib ki, məsələn, çənəniz kiçikdirsə, onu təbii nisbətlərdə artıracağıq. Təmiz dəriyə sahib olmaq hər kəsin əsas hüququ olacaq. Dərinin keyfiyyəti radiotezlik müalicəsi ilə yaxşılaşdırılacaq. Vitaminlər veriləcək. Hazır dolğulardan çox az istifadə olunacaq. Dərinin fotoşop edilmiş kimi hamar və aydın görünməsini təmin edəcəyik.”

Avşar, nə etməli olduğumuz və özümüzə necə qulluq edəcəyimizi müəyyən etmək üçün illər ərzində bir estetik cərrah və dermatoloqla yol xəritəsi tərtib etməyin vacibliyini vurğulayır.

“Üzünüzün formasını və anatomiyasını qorumaq əsas qayğınız olmalıdır. Həddindən artıq dolğulardan, xüsusən də əridikdən sonra yaranan təsvirlərdən xilas olmaq çox çətindir. Tibbi prosedurların məhdudiyyətləri olmalıdır, özünüzü qorumaq çox vacibdir və vaxt və doza dəqiq şəkildə tənzimlənməlidir”, -deyə həkim fikrini tamamladı.

 

Nubar Süleymanova




Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir