SOCI PAXLAVASI

Soçi paxlavası necə hazırlanır? – RESEPT

Baxış sayı: 1. 275

Novruz bayramının qeyd olunduğu günlərdə süfrəmizdə görməyə adət etdiyimiz paxlava hər evdə hazırlanır. Amma təbii ki, sözügedən şirniyyat heç də təkcə bzim ölkəmizdə hazırlanmır. Ölkə hüdudlarından kənarda hazırlanan paxlava haqqında danışmağımız əbəs deyil. Bu yazıda sizə Soçi paxlavasının hazırlanma qaydasından bəhs edəcəyik.

Tərkibi: 

xəmir:

3 st. un
200 q otaq temperaturunda yağ
200 q xama
3 yumurtanın sarısı
0,5 ç.q. soda
1/4 ç.q. duz

iç: 

2 st. qoz (500 q)
darçın
5-6 ədəd hil
3 ədəd mixək
4 yumurtanın ağı
1 çimdik duz
300 q şəkər tozu
vanil

üzərinə:

1 yumurta

Yumurtaların ağını sarısından ayırın.

Xamaya soda və duz qatıb qarışdırın. Həcmi artacaq.

Kərə yağını sürtgəcdən keçirib unla ovun. Yumurta sarılarını əlavə edib yenə ovun, sodalı xamanı əlavə edib xəmir yoğurun.

Xəmiri 3 yerə bölün, kündələyin. Bir qaba qoyub ağzını örtün, soyuducuda 30-40 dəqiqə saxlayın.

İç:

Qozu ət maşınından keçirin, 150 q şəkər tozu əlavə edib qarışdırın.

Darçın, hil və mixəyi qəhvəüyüdəndə üyüdün, ələyib qoza əlavə edin.

Yumurta ağına 1 çimdik duz və 150 q şəkər tozu əlavə edib çəngəllə çalın. Sonra qozlu qarışığı buraya əlavə edib yaxşıca qarışdırın, iki yerə bölün.

30×20 sm ölçülü teflon örtüklü metal formaya perqament döşəyin.

Soyuducudan kündələrin birini çıxarın. Yastılayıb urfasız (un vurmadan), formanın ölçüsündə yayın. Sonra zərf kimi qatlayın və formanın içinə qoyun.

Hamarlayın, için yarısını üstünə bərabər qaydada yayın.
Soyuducudan ikinci kündəni çıxarın, əməliyyatı təkrarlayın (yayın, formadakı için üstünə qoyun, için qalanını üstünə döşəyib yayın). Üçüncü kündəni yayıb sonuncu layın üstünə çəkin. Formanın üzərinə dəsmal çəkib soyuducuda yarım saat saxlayın.

Sobanı 200 dərəcə C qızdırın.

Paxlavanı soyuducudan çıxarın, tərəfi 5 sm olan kvadratlara bölün, üzərinə yumurta sarısı çəkin, sobada 15 dəqiqə bişirin. Sonra dərəcəni 180-ə endirib daha 30 dəqiqə bişirin.

Paxlavanı sobadan çıxarıb soyudun.




Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir