Sinə ağrısı tez-tez insanların diqqətini çəkən, lakin səbəbləri müxtəlif ola bilən bir simptomdur. Ən çox insanlar ürək-damar xəstəliklərindən qorxur, lakin hər sinə ağrısı ciddi xəstəliyin göstəricisi deyil.
Hər bir ağrı, hətta şiddətli olsa da, mütləq həyati təhlükə yaratmır. Çox zaman stress, narahatlıq, yüngül nevroloji pozğunluqlar və ya əzələ gərginliyi səbəbindən döş qəfəsində narahatlıq hiss edə bilərik.
Sinə ağrısının təhlükəli olduğunu necə başa düşmək olar?
1) Ağrının müddəti:
Davamlı və şiddətli ağrı hər zaman diqqət tələb edir. Tibb mütəxəssisləri bildirir ki, beş dəqiqədən uzun davam edən sinə ağrısı zamanı tibbi yardım axtarmaq vacibdir.
2) Əlavə əlamətlər:
Sinə ağrısı ciddi bir problemdən qaynaqlanırsa, aşağıdakı simptomlar da müşahidə oluna bilər:
Nəfəs darlığı
Soyuq tər
Ürəkbulanma
Yorğunluq, zəiflik
Başgicəllənmə və şüurun qarışıqlığı
Qollarda, beldə və çənədə ağrı
Müvəqqəti sinə ağrısı nə deməkdir?
Qısa müddətli, qəflətən baş verən ağrı adətən ciddi tibbi vəziyyətlə əlaqəli olmur. Bu tip ağrı səbəbləri arasında:
Döş qəfəsindəki əzələ gərginliyi və ya qabırğa zədələnməsi
Fibromiyalji və ya döş qəfəsindəki iltihabi proseslər
Sağ sinədə ağciyər problemləri (məsələn, pnevmoniya və ya astma tutmaları)
Yemək borusu spazmları
Bəzən sinə ağrısı yemək borusunun anormal daralması ilə bağlı ola bilər. Bu vəziyyətdə ağrı bir neçə dəqiqədən saatlara qədər davam edə bilər və tez-tez stenokardiya ilə qarışdırılır. Stenokardiya, ürəyin işemik xəstəliyinin klinik forması olaraq sinədə qəfil ağrı və təngənəfəsliklə özünü göstərir.
Sinə ağrısı ilə bağlı ən vacib məqam, özünüzü təhlükəyə atmamaqdır. Müvəqqəti və qısa müddətli ağrı adətən ciddi deyil, amma davamlı və əlavə simptomlarla müşahidə olunan ağrı tibbi yardım tələb edir. Unutmayın ki, stress və emosional vəziyyət də döş qəfəsində narahatlıq hissi yarada bilər, buna görə də sakitləşmək və vəziyyəti qiymətləndirmək önəmlidir.
Nərminə Abbasova
Terapevt, ailə həkimi
