Hər birimiz mobil telefon alarkən onun həm münasib qiymətinin, həm də texnoloji yeniliklərə cavab verən xüsusiyyətlərinin olmasını istəyirik.
Bəs mobil telefon alarkən diqqət yetirməli olduğumuz ən əsas məqamlar hansılardır?
Hər bir mobil telefonun əsas və köməkçi funksiyası olur. Təbii ki, bu funksiyaların hər birini nəzərdən keçirmək lazımdır. Orijinallıq, məmnunluq, büdcə uyğunluğu bunlar üçün çox önəmlidir. Bütün bunlar həm də telefonunuzun istifadə müddətinə də birbaşa təsir edir.
İlk olaraq işlətmək istədiyiniz sistemi seçməlisiniz. Bildiyimiz kimi, smartfonlarda iki əsas sistem var: “Android” və “İOS”. Ən böyük düyün bax bu seçimdən sonra çözülür. “İOS” sisteminə “Apple” şirkətinin istehsal etdiyi “İphone” və onun modelləri, “Android” sisteminə isə “Samsung”, “Huawei” və başqa markalar aiddir. “İOS” sisteminin həm mürəkkəbliyi, həm də fərqliliyi var. Xüsusilə ilk dəfə smartfon istifadə edənlərin birbaşa “İOS” seçməsi doğru deyil. Nisbətən sadə və aydınlığı ilə seçilən “Android” sistemi isə daha münasib, populyardır.
İkinci, telefonların ekranıdır. Müasir smartfonlarda hər yenisi digərindən ekran ölçüsünün iriliyi və nazikliyi ilə fərqlənir. Çox böyük ekran heç də müsbət xüsusiyyət deyil. Ekranın parlaqlığını yüksək səviyyədə qoymaq isə gözlər üçün zərərlidir. Ekranın “HD” deyil, “Full HD” olanını seçməkdə fayda var.
Üçüncü isə telefonun daxili və xarici yaddaşıdır. Bildiyimiz kimi, daxili yaddaş RAM adlanır. Daxili yaddaş tutumunun yüksək olması çox mühüm xüsusiyyətdir. Belə ki, bu zaman telefonda donma, yüklənmə halları az baş verir. Xarici yaddaş isə ən azı 32 GB olmalıdır. Çünki multimedia telefonun yaddaşında çox yer tutur. 8 və 16 GB yaddaş ilə sizin ehtiyat tutumunuz daha tez dolacaq.
Dördüncü, telefonun kamerasıdır. Bir çoxlarımız üçün ən əsas telefonun yaxşı şəkil və video çəkməsidir. Kamera müasir standartlara, geniş imkanlara malik olmalıdır. Kameranın meqapiksel (görüntüləmə) dəyərlərinə, hansı marka lensdən istifadə olunduğuna, diafraqma açıqlığına diqqət etmək lazımdır. Bu qaranlıqda daha effektiv şəkil yaranmasına səbəb olacaq.
Beşinci, telefonun batareyasıdır. Hər nə qədər bahalı, çoxfunksiyalı telefon olsa da, onun istifadə müddəti batareyasından çox asılıdır. Batareya şişib partlamasın, enerjini daha çox saxlasın. Bunun üçün də orijinal olması məsləhətlidir. Hətta batareyanı dəyişdirərkən də, çalışın keyfiyyətlisini əldə edəsiniz. Uzun müddət və tez-tez enerji yığımı da batareyanın ömrünə mənfi təsir edir. Adapteriniz original, keyfiyyətli, gücü yüksək olarsa bu sizin telefonun daha tez enerji yığmasına, batareyanın da daha az elektrikdə qalmasına səbəb olacaq. İkinüvəli prosessorlu smartfon aldığınız zaman, 1600 mAh’dan yuxarı, dörddüvəli prosessorlu smartphone alırsınızsa, 1800 mAh və daha yuxarı batareya gücünə malik olmasına nəzər yetirin. Hər bir batareyanın normal işləməsi maksimum 6 ay və ya 1 il olur. Əgər, telefonun batareya gücü, məsələn 25-30 saat yazılıbsa, daha tez 15-17 saat ərzində batareya tez bitirsə, aldığınız yerə müraciət edin. İkinci əl telefon aldıqda, buna o qədər fikir verməyin. Çünki onsuz da əksər satılan modellər 6 aydan çox istifadə edildikdən sonra, satılır. Amma yenə də araşdırmanız nəticəsində, məsələn, satıcı telefonun batareya gücünün 15-17 saat olduğunu desə də, amma istifadə zamanı sadəcə 6-7 saat istifadədən sonra bitirsə, onda satıcıdan yeni batareya tələb edin.
Altıncı, ağıllı telefonlarda təhlükəsizlik üçün müxtəlif xüsusiyyətlər mövcuddur ki, bunlardan ən etibarlısı fikrimcə Göz qişası skaneridir. Göz qişası skaneri smartfonlarda mövcud olan ən üstün təhlükəsizlik tədbirlərinin başında gəlir. Bu xüsusiyyəti həm ekran kilidi üçün həm də vacib faylları qorumaq üçün istifadə edə bilərsiniz. Telefonun ön kamerası vasitəsilə ultraqırmızı şüalar sizin gözlərinizi skan edir və sizin telefonun əsl sahibi olduğunuza arxayın olduğundan sonra gizlənmiş materialları və ya ekran kilidini açmağa icazə verir.
Təhlükəsizlik üçün digər bir vacib funksionallıq barmaq izi sensorudur. Bu təhlükəsizlik baxımdan çox vacibdir, sensor sadəcə əsas ekran kilidi üçün yox, telefonunuzun içində yerləşən vacib faylları da qorumaq və barmaq izi ilə açmaq üçün də istifadə edilə bilər. Hətta bu cür sistemlərdə hər tətbiqetmə üçün fərqli barmaq izi istifadə etmək də mümkündür.
Yeddinci, telefonun səsləndirmə imkanlarıdır. Telefonun səsinin aydın və müəyyən səs tezliyində olması önəmlidir. Bunu yoxlamaq lazımdır. Həm telefonun, həm də qulaqcıqların səs imkanlarına diqqət etməliyik. Bu xüsusiyyətlər keyfiyyət səslənmə üçün vacibdir.
Səkkizinci, telefon aldığınız mağazaya da diqqət etməlisiniz. Telefonu uzun müddət istifadə etmək istəyirsinizsə, o zaman orijinal, qeydiyyatlı və zəmanət talonlu mallar təqdim edən satış obyektlərinə yaxınlaşın. Çünki zəmanət talonu sizə telefonunuz xarab olduqda, onu təmir etdirməyə və ya dəyişdirməyə imkan verəcək.
Telefon alarkən onun qiyməti qədər, keyfiyyəti də önəmlidir. Qeyd etdiyimiz məqamlara isə xüsusi diqqət olunmalıdır ki, işlək və problemsiz telefon əldə edəsiniz. Unutmayaq ki, bizə yaxın olan mobil telefonların keyfiyyətinin yüksək olması təkcə istifadə rahatlığı üçün deyil, həm də sağlamlığımız üçün vacibdir. Hər kəs öz zövqünə, tələbatına ən əsası da büdcəsinə uyğun mobil telefon alır.
Yaqut Ağaşahqızı
